ASF-ah kan tiṭha ber em?

Vawk pul hri African Swine Fever (ASF) hmachhawn danah Mizoram chu India rama tiṭha ber kan ni tiin AH & Very Minister an chhuan thu MNF party thuchhuah chuan a tarlang a, "Theihtawp a chhuahna avangin Mizoram hi ASF management-ah India rama tiṭha ber kan ni. State dangah mumal taka vawk suat a ni ve lo," an ti a, Mizoram chauh hi vawk suat compensation dawng tur kan nih thu an tarlang.

Vawk pul hri hlauhawm takin India ram hmar chhak state hrang hrang a tuam a, Mizoram hi a van­duai ber pawl niin vawk thi leh vawk suat tam tham tak a awm phah a, cheng vaibelchhe 60 chuang man vawk an thi niin sorkar official-te chuan an sawi. Mizoramah hian district 11-ah vawk pul hri hi a leng vek nia ngaih a ni a, khawi lai mah him a awm lo tihna a ni ber ang.

Hetihlai hian ASF hri len ve thona hmar chhak state ṭhenkhatah chuan he hri hlauhawm tak hi an thunun thei thung a ni. Meghalaya, Tripura, Sikkim leh Manipur-ahte pawh hri hi hmuh a ni ve chungin Mizoram anga chhiatna rapthlak hi a thleng ve lo. Sorkar thuneitu lamin theihtawp chhuahin hri a darh lohna turin ṭan an la a, vawk an suat piah lamah vawk sa lut leh chhuak tur an khuahkhirh ṭha a, hei vang hian keini angin harsatna an tawk nasa ve lo niin a lang.

Mizoram sorkarin vawk a suat zozaite hi a uiawm tham hle a, chutih rualin zangnadawmna dawng thei tura ṭan a lak dan erawh a fakawm hle a ni.

Vawk pul hri hlauhawm tak a leng a, vannei leh vanduai kar a hla a ni. Hetiang boruaka a vawk chân tam lam state-in 'tiṭha ber' lawmman keimahni leh keimahni kan lo inpe ve ngawt mai hi state dangin engtin tak ngai ang maw?