Mau chi supply

Horticulture department chuan thuchhuah siamin, mau chi supply-tu tur zawnna atana tender an chhuah chungchang an sawifiah a, "Mau chi leina turin Covid-19 dona tur pawisa a tibuai lo," an ti a; dan dik takin advertisement chhuah a nih thu an sawi. 

Mau chi supply hi tuna tih thar thut a ni lo a, hun rei tak chhung lo inbuatsaih tawh a nih bakah hunbi neia kalpui ṭul a ni a, phun hunbi nei a nih bawk avangin hmanhmawh taka kalpui tur a nih hmel. Model Bamboo Plantation program hnuaiah chhungkaw thlan bikten mau chin hi an kalpui mek tawh zawk a ni. 

Hei vang hian sorkar insawi­fiahna hi mipui pawhin pawm thiam ila, rem leh rem loa tu emaw hmeh bela sawisel tur zawng ang maia kawh rawn luai luai a hun lo ang. Sorkarin thil a lo kalpui ṭan tawh a, a zuzi mai lohna tura mau chi supply-tu tur zawn pawh hi thil âwm tak a ni. 

Mipuiin an chân ṭhup tur zawk erawh chu, "Tunge mau chi hi supply ang?" tih hi a ni awm e.  Kan rorelna in säng ber Assembly House-ah ngei pawh mau chi supply hian sawi a hlawh tawh a, rorelna vawnfung chelhtu party lamin an flagship programme-ah mau (rua) an thlan bawk avangin ngaihven a hlawh lo thei lo. 

Mi ṭhenkhat chuan hri lenlai leh pawisa awm lohlaia mau/ raw chi supply-tu tur thlan hi hun loah an ngai ang a; mi ṭhenkhat ngaihven zawk tur erawh chu, "Tunge mau/raw chi hi supply ang?" tih hi a nih hmel.