Kan sum dinhmun leh kan sawi dan

Mizoram sum dinhmun a ṭha loin Treasury-in hun rei tak chhung sum a pe chhuak tawh lo a. Congress party chuan Finance changtu Chief Minister chu sum enkawl thiam loah an puh a, Treasury chu a takah chuan khar a nih hmek thu an sawi.

MNF Adviser leh Home Minister chuan sum dinhmun ṭha lo chu Chief Minister-in sum a enkawl thiam loh vang ni loin Covid vanga sum lo kal a tlem tak vang leh thawh chhuah kan neih tlem vang niin a sawi thung a. Congress hunlaia Finance Minister chu sum enkawl thiam ni bik loin 14th Finance Commission-in state-te sum a pek ṭhat vang niin a sawi ve thung.

Kan ram sum din­hmun chhiat chhan hi kan dawn tur ang kan dawn loh vang tih hi a dik ngei ang a, kan dawn chhun ang ang kan hman dan lam pawh bihchian a ṭah hle ang. Khawpuia lirthei hûnna tur PAHOSS-a sum kan hman huau huau laia kan mamawh ngawih ngawih thil ṭhenkhat kan hlamchhiah dan te, state budget pharh laia tel si lo CM nek thiam deuhin an lak chhuah zung zung theih sum hman tam lutukte pawh hi lo inveng uluk deuh se tun ai hian kan ziaawm ngei awm e.

Thawh chhuah kan neih tlem avanga kan sum dinhmun harsat chung­changah hi chuan sorkarna chelh tawhtute hian thiam thu sawi tur an nei lo hle niin a lang. Kan ram min enkawlsaktute hian intodelhna kawng min zawhpui lo a, tunah sum a lo luh tlem deuhin an kâwt chu a ni ta deuh ber.

Kan sum dinhmun a ṭha lo a, kan sawi zui duh dan te, kan insawi thiam dante leh midang kan puh dante chu eng pawh lo ni se, sorkar hian a intiam ang chin tal chu tihlawhtling se.

A duhna lama sum hman insum chuang lo sorkar a nih avang hian 'Covid vang' tia a remchanna apianga chhuanlam siam hi sim a ṭha khawp mai.