Covid-19 kai leh kai lo enna RT-PCR leh Mizoram politics

ZPM Legislature Party leader MLA Lalduhoma chuan sorkarah Covid-19 kai leh kai lo enna RT-PCR leina tur sorkara pek a duh chu June 1-a a thlen thu leh, sorkarin a ngai lem lo tia an chhan thu a sawi. Congress Legislature Party leader Zodintluanga chuan Health department-in rem an tih chuan Lunglei Civil Hospital-a dah turin Covid-19 kai leh kai loh endikna kháwl, RTPCR chikim a leisak tur thu June 13 khan a sawi.

Khawvel hmun dangte ang bawkin Mizoramin Covid-19 hripui a hmachhawn mek a, India ramah chuan Mizoram hi sorkar leh mipui thawhhona a ṭhatna ber state a ni hial awm e. Hlawh nei loa mahni inpea ramri venga riak chhuak ṭhahnem tak an awm reng a, mahni khua leh veng ṭheuhte venghim turin task force an pen chhuak a; hetihlai hian kan do ber Covid-19 vei leh vei lo enna RT-PCR khawl erawh Mizoram sorkarin ama pualin a lo la nei reng reng lo. 

Sorkarin a bul ṭanna atan Mizoram University, Pachhunga University College leh CAU, Selesih aṭangin RT-PCR a hawh khawm a, hei bakah hian Institute of Bioresources & Sustainable Development (IBSD), Imphal aṭangin a hawh bawk. Hetihlai hian Hauva & Sons-te chuan RT-PCR kan mamawhna hriain Health Minister hnenah cheng nuai 21 an pe a, hemi hmang hian sorkarin khawl hi lei tumin a buaipui mek niin a lang. 

Mizoram sorkar hian, "Hripui kan do a, tumah insawisel mai loin i ṭangrual ang u," ti reng siin eptu MLA lamin tha an thawh vena tur lam chu dan beh zel tum ang maiin thil a kalpui a, a zialo hle a ni. ZLP leader-in RT-PCR thawh a tum hi sorkarin eng vanga phal lo nge a nih a, eng vangin nge he mi hnua mimal hnen aṭangin RT-PCR leina tur thawhlawm a dawn leh si? CLP leader inhuamna sawi chhuah a nih hmaa Lunglei lama laboratory dinna tur thâwm awm si lo, CLP leader thusawi tuka chawpchilh taka Lungleia RT-PCR khawl dah theih a nih leh nih loh endiktu an intir maite hi a chhan eng nge ni ta ang? 

RT-PCR hi sorkar tan khawl man to a ni hauh lo a, a ngai pawi­mawh a nih chuan a lei daih tawh tur a ni. Thil lei harsa niin a lang lo a, mi inphalte'n a leina an thawh chuan chawpchilh taka lei turin ruahmanna an siam rum rum thei tho si a, eng vangin nge mi khawl hawh chawpa kha leh chen Covid-19 hripui kan lo hmachhawn ni?

 

Tunah hian swab sample lak tawh sa ringawt pawh test theih loh 2,000 dawn an la awm niin an sawi a, phai aṭanga rawn haw zingah swab sample pawh la lak loh ṭhahnem tak an la awm. Hengte avang hian RT-PCR neih belh a, test zung zung hi kan himnna atan a pawimawh hle. Kan laboratory-in RT-PCR chawm theih chin chu a nei ngei a; nimahsela kan khawl hawh khawmte thlakna tur tal pawh hi lei belh kan mamawh tih a chiang a, sorkarin mimal sum thawhna remchang hawng a, eptu MLA-te chetna tur dâl tum ang maia a kal hi a zialo ngawt mai. 

Hripui kan hmachhawn a, ṭang rual tur kan ni a, mipui lamin tha an thawh piah lamah sorkar ring tawkin sum ṭhahnem tak an thawhlai hian, political pary inthliarna vangin kan thlan tlin roreltute hi an lo indâl vel mai mai a nih chuan a pawi ngawt ang.