Industry lem leh Mizoram

Commerce & Industries department hotute chuan Mizoramah industry anga inziak lut zingah hmuh chhuah zawh loh leh industry lem a tam hle tih an sawi a; industry nei anga insawi tam takin bank loan lak nan te, telephone connection neih hma nante leh central sorkar aṭanga scheme dil nante an inziak lut hlawm niin an sawi. 

Mizoramah hian ziaka a lan dan chuan industry hi ṭhahnem tham tak awm tawh angin a lang a, sorkar laipui aṭanga ṭanpuina hrang hrang hai chhuak theite sum che vel thlir phei chuan industry hlawhtling fe fe hmuh tur awm ṭheuh tawh tur ang a nihlai hian, a taka sawi tur industry hi kan la ngah lo hle. 

Mizoramin industry kan hmelhriat danah thil fuh tawk lo tam tak a awm a, hnathawk peih tak takte ṭanpuina tura central sorkar aṭanga puihna awm chu mi ṭhenkhat chuan a industry kal pui tak tak lam aiin an tuipui zawk. Tun hma aṭang tawhin subsidy hrang hrang kan hmuh theihte chu kan industry puitlin loh chhanah kan hmang hlauh tawh zawk a, mi ṭhenkhatin hausakpui mah se a ram pum angin industry lama kan hnufum chhan angah a puh theih ang. 

Ṭhangthar lehkhathiam zingah pawh 'project' siama sum hai luhna ang maia a hminga industry kalpui anga lang, a  taka an hnathawh hmuh tur awm si lo eng emaw zat a la awm cheu a, a vanduaithlak hle a ni. Tun hmaa kan mi hmasate'n an tih dik loh awmte kha tawk tawh se, ṭhangthar zawkte hi chuan dan ang taka thil kalpuiin state dangte el chunga ram tana rotling tura industry kalpui tum hi a hun ve tawh hle a ni. 

Hetihlai hian tun hnaiah a taka industry kalpui tuma theih tawpa ṭan la an awm ve reng bawk a, industry-ah pawh a tak leh a lem hi a inthliar chho ve ṭan mek a, zawi zawiin kan ramin industry lamah bung thar a kai thuai theih i beisei zel ang u.