Test chak theih loh chhan

Tun hnaiah Lunglei quaran­tine facility-a awm hmeichhe ṭhenkhat chu ni 10 hnuah pawh an swab sample an lak result an hmuh theih loh vanga lungawi loin chaw an nghei. Hetihlai hian ZMC director chuan thawktute'n rim taka theihtawp chhuaha an thawh thu leh, zing dar 9:00 aṭanga zanlai pelh thlenga an thawh ṭhin thu leh, fimkhur tak chunga a rang thei anga an kal chungin test chak a harsat dan a sawifiah. 

Tun hnaia kan thil tawn mek hi khawvel pawhin a buaipui a ni a, Mizorama harsatna kan tawk hi a mak lem lo a, a taka thawktute an hah tawh hle ang tih a chiang. Chutihlaiin Covid-19 positive-te nena hmun khata awm chunga swab sample laksak tawh ni 10 zet an nghak hi chu an lainatawm takzet a, a kalphung fel zawka duan dan chu awm se a ṭha khawp mai.

Thawktu lam tan chuan an hmanraw neih ang ang, mi leh sa neih ang anga mipui mamawhna phuhruk tura theihtawp chhuah bak tih theih a awm lo ang; nimahsela thuneitu sang lam tan chuan awmze neia thil rel fel theih, khawl leh mihring mamawh zat tur pawh ruahman lawk a, pawh khawm theih a nih hmel. 

State pawn aṭanga lo hawte hun inhnaih lutuka a hlawma hruai kir hian harsatna a siam phawt a, an swab sample endik chu sawi loh an riahna tur buaipuiin sorkar lu a hai hle a ni. Hemi piah lamah hian a tirah a inring thiam lo deuh nge, kan hotute'n a endikna ber RT-PCR lam an lo hlamchhiah veng veng mai hi kan buaina lian tak chu a ni. Chumi piah lamah laboratory-a hna kal tichak tura mihring indah belh (data buaipui turte thlengin) ngai lo hian inruahman lâwk thiam chu ni se a ziaawm deuh ang. 

He hripui hi a tihdamna tak tak a awm loh avangin mitin inveng chunga thuneitu lamin a tam thei ang ber an endik (test) a ṭul a, a endikna khawl (RT-PCR), a endiktu leh a endiktute puitu lam a tam thei ang indah a, a 

ṭul a nih chuan hmun danga mite pawh inchah khawm tur a ni ang. Mamawhna a san zual bik chhung chu ZMC hi thuam chak deuh a ngai niin a lang.