Zir chian hmasak ṭhin ni se

Sialhawk khuaa lakhuihthei thar chhuah kg 200 chu tun hnai khan Dubai, UAE-ah thawn chhuah a ni a, hmun dangah pawh thawn chhuah zel tum a ni a, Deputy Chief Minister-in a vai liam a ni.

Horticulture Department hotute sawi danin tuna an thawn chhuah hi chu enchhinna chauh a la ni a, "A bul ṭan nan hloh pawh huamin hma kan la a ni," an ti a; a hlawhtlin chhoh chuan lian thama kalpui zel an tum thu an sawi.

Lakhuihthei hi thei tui tak a nih rualin thei ṭawih chhe awl tak a ni a, a hralhna zawn hmuh a pawimawh rualin rang taka hralh theih a pawimawh tel bawk. Thei rit tak a nih tel bawk avangin thlawhtheihna hmanga hralh tur râlah chuan a hlawk lo palh mai ang tih pawh a hlauhawm a, hmun hla taka harsa taka hralh ai chuan lam hnaia rang zawka hralhna zawn thiam a finthlak hle ang.

Tunlai khawvelah chuan lian thama hmalak a nih hmain mithiamten a market an zir chiang hmasa ṭhin a, hei hi kan sorkar pawhin an kalpui turah ngai phawt ang. Lakhuihthei hi tun hnaiah a hlawm lianin kan thar chho ta a, hemi hma hian kum tam tak chhung chu kan ṭhenawm Assam leh Tripura hi lakhuihthei nei tuia sawi an nih bakah foreign thlenga a hlawma thawn chhuak tawh an ni. Anni hlawhtlin dan leh harsatna an tawhte pawh zir chian phawt ni se, chumi hnuah kan tana hlawk tur ang zawnga kalpui thiam a pawimawh ang.

Kan thlai leh thei tharte hmun hla zawka thawn chhuah a ni hi a lawmawm a, hlawk thama a hlawm liana thawn chhuak turin uluk zawka zir chian ni se a lawmawm ang.