Hri len laia sorkar sum che vel

Tun hnaiah Mizoram sorkar chuan sorkar hnathawkte hlawh a pûk/ bat ṭhensak dan tur ruhmanna a tifel a, Covid-19 avangin state-in sum leh paiah harsatna a tawk mek a ni. Hetihlai hian sorkar hian hmasawnna hna hrang hrang a kalpui mek zel bawk. 

Mizoram bil harsatna ni lo, India ram state hausa­te leh a India ngei pawhin harsatna a tawh lian tak chu sum leh paia harsatna a ni. Kan hriat ngai loh hripui a leng a, invenna atan sum tam tak hman a ngai a, damlo enkawlna atan sum tam tak hman a ngai bawk. Hetihlai mek hian Mizoram sorkar chuan sum leh pai inrenna tur âwm tak nia lang, a loa kan awm theih ṭhenkhatah hna a kalpui mek zel.

Mizorama thil kalphung nghet tawh tak chu 'party mite induhsakna hna pek' a ni a, chu hna inpek zinga langsar tak chu construction hna contract-a inpek hi a ni. Tu party kaihhruai pawhin sorkarna siam se, an mi leh sate lungawina turin hna hi a semin an sem mai ṭhin a, hei hi kan ram hmasawnna tur sum luan ralna lian tak a ni bawk. 

Kan sorkar hian hripui a leng mek tih hi hriain contract hna a pek chhuah ṭhenkhat hi chu insum ṭhen se a ṭha khawp mai. Sorkar hnathawkte hlawh pûk ngai hial khawpa a sum bawm a ruahlai a, 'ruahmanna kal sa alawm' tih vang ringawta a loa kan awm theih tho si contract hna a sem chhuak chhunzawm reng maite hi insum deuh se a ṭha khawp mai. 

'Budget chu duh leh kan chhum ang a, duh leh kan kang ang,' tia mipui pawisa neitu anga inchan a, pawisa pûk ngai khawpa kan tlakchhiat mek tawh hnua bat anga ngaia contract kan la sem chhuak chur chur mai hi chu a zialo khawp mai. Sorkar hnathawk pawisa puk hi budget kalhmang pangngai a ni lo a, chuvangin hri len lohlaia 'hmun danga hman pên a rem lo,' kan tih ṭhin pawisate pawh hi sorkar hian hri dona sumah hian pawt peng ve hrih mai se a ṭha ang. 

Hmun danga rethei ber anga pawisa pûk laia hmun danga party mi leh sa in vulhna tura contract sem chawl si loa sorkar a kal zel a nih chuan, hri doa kan ṭan dan hi a rual lo palh ang e.