Mipui leh sorkar hnathawk inkar

Mizoram Chief Minister chuan sorkar hnathawkte chu mipui tana dawr nuam tak ni turin a chah a, an hna­thawhnaah mipui dah pawi­mawh thiam turin a chah a ni.

Chief Secretary thusawi hi thil pawimawh tak a ni a, thil zawm harsa lo tak anga lang ni hi mi ṭhenkhatin an zawm hleithei ṭhin lo a ni. Sorkar hnathawk zingah thawk ṭha tak tak, an thawh chhan mipuite pawh hrethiam em em an awmlaiin sorkar hnathawk dawr hrehawm tak an awm ve bawk ṭhin a, hei hi Chief Secretary pawh hian a sawi chhan a ni ngei ang.

Sorkar hnathawkte hi an thawhna hmun azirin mipui nen an indawr nasa ṭhin hle a, ṭhenkhat phei chu nileng maia mipuiin an bawrna office-a thawkte an nih avangin anni tán pawh ṭhat chhuah reng hi thil harsa tak a ni ngei ang.

Mipui lam pawh kan inang lo a, sorkar hnathawk tan pawha puih hrehawm tur khawpa awm duhte pawh an awm nawk ve thei ang. Ṭhenkhat chu thil kalhmang hre lo takte pawh an ni ṭhin bawk ang. Hetiang hunah tak hian a chinchang hre zawk leh a hmun ṭhu zawk office lam thawktuten rilru zau an put a pawimawh hle.

Sorkar leh mipui inkar siam ṭha theitu pawh hi sorkar hnathawkte an ni thui hle a, sorkar hnathawk ṭha chuan sorkar hmel a timawiin mipui pawh a tilungawi a, ramin a chhawr ṭhin a ni. A lehlamah sorkar hnathawk ṭha lote avangin sorkar hmai a balin a hming chhe thei a, hei hi thil lo thleng tawh ṭhin pawh a ni reng a ni.

Chief Secretary fuihna hi sorkar hnathawk lam hian hre reng se. Mipui tana dawr nuam ni turin thil danglam tak va tih chiam pawh a ngai lo a; hawihhawm, fel leh rinawm taka hnathawktu hi mipui chuan dawr nuam an ti ṭhin.