Lirthei khalhtute fimkhur zual se

Mizoram sorkar chuan lirthei khalhtute'n dan an bawhchhiatna hremna na zawk, Motor Vehicles (Ammendment) Act, 2019 chu September, 2022 aṭang hian an hmang ṭan dawn ta a; sorkar laipuiin hmang tura an nawr nasat vanga hman a nih dawn thu Transport department Secretary chuan a sawi.

He dan hman tur hi dan thar a ni tawh lo a, kum 2019 aṭang khan hman a lo ni tawh a, chutihlaiin state tam tak chuan an la hmang lo thung. He dan thar hnuaiah hi chuan lirthei khalh chunga dan bawhchhetute hremna hi a na hle a, pawisa chawi tur punna pawh a sang hle a ni.

Transport Secretary sawi dan chuan he dan thar a nihna anga hman hi Mizorama kan Transport Minister chuan a la duh lo a, a chawi tur a san em avangin tihhniam theih a nih leh nih loh chungchangah mithiamte pawh an rawn a; nimahsela sorkar laipui rawtna siam anga kalpui turin an rawn ta zawk a nih hmel.

Engpawhnise hetianga mipui nghawng sum chawina tur thil hi chu sorkar lamin an hrilhfiah hi chuan mipui harsatna hrethiam mah se loh theih lohna avanga hmang an ni deuh zel a, chutiang chiah chuan he dan thar pawh hi thuneituten 'an la duh lo chung' an hmang dawn ta a ang hle!

A pawimawh ber chu dan hi midik tan chuan thil hlauhawm a ni lo a, dan bawhchhiate tan hremna a sang dawn tihna a ni mai a, lirthei khalhtute'n fimkhur lehzual phahna atan hmang se a ṭha hle ang.