Health department audit thu

Mizoram sorkara Health department pawisa hman dan chu Finance Department ruahmanna angin Accounts and Treasuries hnuaia 'Special Audit Team' te chuan tun hnai khan an audit a, Covid-19 thila sum a hman dante an endik a ni. 

Mi ṭhenkhat chuan hri lenlai leh hri doa kan buai em em lai, sorkar hnathawkte pawh an in kalchhawka an indaih lohlai taka Health department sum hman dan endik hi an hrethiam lo a, a phêna thil awm thei tur ngaih ruatin social media lamah thu an thehdarh nasa hle. Finance minister leh health minister inkar boruak ṭha lo anga lan luihtir tumin thil an thehdarh chiam a, a nihna tak finfiah theih si loah politics thil inphum ru awm anga boruak siam tum pawl an awm. 

Health department hian hri dona atana sum hman tur Finance department lama a dil hnawlsak a lo nih tawh nen, tute'n emaw an rinthu liau liaua political party chhungkuaa boruak awm anga lantir tumin department pahnih changtu lam aṭangin thil an sawi zawm a, finfiahna awm tak tak thei si lo thil an sawi kual tam viau a ni. 

A nihna takah chuan he hri leng avang hian kan awm dan phung tam tak a buai ang chiah hian sorkar kalphung pawh nasa takin a tibuai a, hmanhmawh taka sum hmanna tur a tam a, sum lo luhna ṭhin pangngai ni loah sum a lut a, a hmanna ṭhin loah hman a ni bawk. Health department-in sum tam tak an khawih a ngai thut a, hmun dang aṭanga sum an dawn nual bawk avangin dan anga audit hi chu thil mak a ni lem lo. 

Sorkar kalphungah hian audit hi tih fo tur a ni zawk a, Mizoramah hian hun kan neih loh vang te, thawktu indaih tawk loh vang te, a thuneitu lamin ṭul an tih lem loh vangte pawh a ni mai thei, hetianga audit neih hi thil thleng khat angreng tak a ni. Duhthusamah chuan audit hi zing zawka kalpui theih ni se, Comptroller and Auditor General (CAG) lamin external audit an kalpui ṭhin ring mai lo hian, Finance Department hian hri len lai lo pawh hian internal audit hi tun aia zing (regular) zawk hian kalpui thei se a ṭha ngawt mai.