Hortoki khawtlang lungawi lohna

Hortoki khuaa pawl hrang hrangte chuan thuchhuah inṭawm siamin tun hnaia an khaw nu Civil Hospital, Aizawla a thih danah an lungawi loh thu an tarlang a; nurse duty lamin an ngaihsak tawk loh avang leh an tih tur an tih loh avangin he vanduaina hi a thlengah an ngai.

Health Minister chuan Hortoki khaw mipuite lungawi­lohna chu a hriat thu leh âwm a tih thute a sawi a, he thil thleng hi sorkarin a chhui chian tur thu a sawi bawk a ni.

Damdawi-inah hian damlo tam tak an awm ṭhin avangin thawktu tan pawh damlote duh anga enkawl vek sen a ni kher lo ang a, chutihlaiin ngaihsak loh vanga thihna thleng anga lang hi chu chhui chian ngei chu a ṭha ang.

Mizoram sorkar hnuaiah hi chuan thil chhui chian ringawtah hian a tawp duh khawp mai a, a bikin thawktu lam han hrem zuina emaw hi hriat tur a vâng hle. Tuna thil thleng hi thawktu inthlahdah vang emaw, damlo an ngaihsak tawk loh vang emaw a nih ngai chuan hrem phu chu an awm ngei tihna a ni ang; an chhui chian hnuah thil awm dan a fiah thei ang.

Engpawhnise damdawi-ina thawktute hi an ṭulin an hah ṭhin a, mipui pawhin kan hriatthiam an ngai hle. Hetihlai hian an hna a nih miau avangin an inthlah­dah avanga mi nunnain a tuar a nih chuan thil dik lo tak a ni ang.

Hei vang hian Hortoki khawtlang puhna hi a dik nge dik lo tih hi sorkar hian ṭan lam nei loin chhui chiang se, mipui hnenah thil nih dan dik tak puang ngei bawk rawh se.