Mizo cement mistiri

Mizoram Youth Commission (MYC) leh Central YMA chuan Mizo ṭhalaite tan cement mistiri training an buatsaih mêk a; CYMA-in cement mistiri training a buatsaih hi ṭum 19-na ni tawhin zir duh hming pete zingah mi 52 thlan an ni.

Tun hma deuh kha chuan cement mistiri hna hi hnam dang tih turah dahna a lian hle a, a bikin Vai kan tih maite kha a thawktu hmasa an nih vang pawh a ni ang Mizote thawh turah kan ngai meuh lo. CYMA-in training-te a buatsaih a, mamawhna a lo san bawk avangin Mizo zingah cement mistiri nih hreh lo an pung chho zel a, a tir lama training tur a zawna zawn khawm ngai kha tunah chuan thlan sen loh an awm ta niin a lang.

Mizote pawhin kan thawh thiam em em hna ni si hi hnam dang kutah kan dah rei hle a, hnam dang cement mistiri-in Mizote sum leh pai an laksak hi a tam tham hle a ni. Mizorama hnam dang hnathawk zinga a tam bera chhal ngam chu cement mistiri leh an thawhpuite an ni a, anni hna chhuhsak tur leh mahni intodelhna atan pawh cement mistiri nih hi a ṭul hle a ni.

Mizo cement mistiri hna thawk mekte pawh inzir chho zel se, hna thiam lama an tluk reng hnam dang mistiri-te hi hawihawm, hun vawn dik leh thuawih theih kawngahte an tluk lo fo a, a ruaitu tana rawih nuam tak tura hna awm dan thlengin zirna hmunah hian inzirtir ni se a lawmawm ang.