Kan inhmuh dan leh mi min hmuh dan

Mizoram Chief Minister chuan, India hmarchhakah Mizote chu hnam dangin tluk loh enah an en vek niin a sawi a; Mizote chu vantlang nun danah India hmarchhak bialah an chungnun thu sawiin, "Hmarchhaka hnam hrang hrangte hian hnam ang chuan tluk loh enah min en vek tawh. Sakhuana lamah pawh kan bek thlêk lam an thlir ṭhup. Bible Society lamah pawh mi dang zawng zawng thawh belh khawm aia tam deuh thaw kan thawh ṭhin a ni," a ti.

Chief Minister thusawi hi thui tak a dik rualin tuna kan dinhmun en hian hmarchhak hnam dangte tana dahsanna tur hi kan tam lo mai thei; mi min hmuh dan tak tak leh miin min hmuh dan nia kan hriat hi a inpersan palh ang tih hlauhawm tak a ni.

Tun hnaiah hmarchhak state-a ṭhang chak lo hi thlang dâwn ta ila Mizoram hi thlan tel a ngai hial mai thei. Tehna hrang hrangah a tiṭha pawl kan nih phak loh avangin kan ṭhenawmte hian min ngaisang ta vak lo a nih pawhin thil mak a ni lo ang. Zirna leh thiam­naa inelna pakhat UPSC exam-ah pawh a tling khât ber kan ni tawh hial mai thei. Kawng ṭhenkhatah hma kan sawn viaua a lanlai hian kan hniamna lam pawh hi a awm zel a ni.

A state puma thawh chhuah nei mang lo state, chhiah kan khawn khawm tih loh kan thar chhuah leh a thawha thawh chhuah aṭanga sum lakluh nei ve mang lo state kan ni a; chumi chhunga chengte chu kan hmarchhak unaute hian tun hmain min lo en säng ṭhin a nih pawhin tunah chuan an ngaihsan tur hian kan awm ta mang lo - ṭan a ngai hle.

Mi ṭhenkhat hi chuan hmarchhaka hnam dangte hian min dah säng viau turah kan la inngai a ni mai thei a; nimahsela kan ram dinhmun te, kan hnam thlen chinte ngun taka chhût chuan tunah hi chuan min dah sang zui vak lo a nih pawhin keini lam thiam loh a ni ngei ang.