Aizawla in hmun dil dan kalphung

ZPM Ṭhalaite chuan Aizawl khawpui chhunga in hmun dilna form la chhuak turin LRS Minister phalna lak kher a ngai niin an sawi a, House Pass dilna form la chhuak tura Minister phalna dil a ngaih thu hi dan ṭan chhan awm loah ngaiin titawp turin thuneitute an ngen.

Aizawl khawpuia in hmun dil duhte tan a kawng a thui hle mai a, Land Revenue & Settlement lamah thawktu an indaih loh avangin a nghah chhung pawh a rei hle a ni. Sorkar tan in hmun pek chhuah hi thil tih zung zung theih a ni lo a, fimkhur taka kalpui a ṭul piah lamah thawktu an indaih loh avangin harsatna tam tak an tawk a ni.

Hetihlaia a dilna form la chhuak tur ringawta Minister pal tlang a ngai hmasa erawh thil mak tak a ni a, hei hi a Minister tan ngei pawh hna siam belhna leh phurrit a tling thei ang. he chin ṭhan (practice) dan hi a ṭhat zawkna emaw, a him bikna emaw a awm lem loh chuan tihtawp theih ni se a ṭhat hmel a, state dangah chuan hetianga kalpui hi a nih a rinawm lem lo a ni.

Sorkar hi mipuite tana harsatna thlentu ni loin awlsamna siamsaktu tur a ni a, in hmun form dil chhuah aṭanga Minister phalna a ngaih tawh chuan mipui tan phurrit a tling palh thei a; LRS lam pawhin in hmun dilna form lak chhuah dan ṭha zawk hi an duang thei ngei awm si a.