Mizoram Rajya Sabha MP

Tun hnai khan Mizoram Rajya Sabha MP tur thlan a ni a, MNF candidate K Vanlalvena (50), Bawngkawn, Aizawl a tling. Vote 40 awmah BJP MLA Dr BD Chakma chuan vote a thlak lo a; MNF candidate hian vote 27 a hmu a, ZPM candidate-in vote sarih hmuin Congress candidate-in vote nga a hmu. 

Rajya Sabha inthlan hi chu vote hmuh tur zat hre saa inthlanna a ni ber a, mipui lam pawhin an ngaihven tawk lo a, political party chhunga awmte ngei pawhin a candidate thlanlai aiin a inthlan taka hi an ngaihtuah ta lo emaw tih tur a ni fo ṭhin. Ruling party lamin MP candidate an puan rualin MP thar hi a chiang nghal a, chuvangin a inthlan tak hi chu a tih tur tihkimna (formality) ang lekah pawh a ngaih theih awm e. 

Hetiang hi ni mahse Rajya Sabha MP pawimawhna hi a nêp phah hauh lo a, India rorelna in sang zawka Mizoram aiawh tur thlanna a ni. Hei mai hi a ni lo, Mizoramin Rajya Sabha MP pakhat chiah kan neih avangin hnam aiawhtu a ni tel a, a thusawi te, a che zia te, a hnathawhte hi kan hmel lanna zel a nih avangin he dinhmun hi a pawimawh hle a ni. Hei hi kan MP thar pawh hian a hre ngei ang a, Mizoram tihmingchhe lo tur satliah mai ni loa Mizoram leh hnam tihmingṭha turin mipuiin kan beisei tlat dawn a ni. 

Tunah chuan political party hmanga inthlanna a zo tawh a, a thlan chhuah MP hi chu party pakhat MP ni loin Mizoram pum huap MP a ni a, chu chu amah pawhin a inhriat reng a ṭha ang. Parliament House chhungah a ni emaw, a pawn lama MP hnathawhna dangah pawh state khat aiawh a nih inhriain taimak chhuah se, MP chhuanawm tak ni turin duhsakna i hlan ṭheuh ang u.