Contractor kan ngam lo em ni?

YMA Sub Headquarters, Lunglei hruaitute chuan tun hnai khan Lunglei bial aṭanga thlan tlin MLA palite Lunglei Circuit House-ah an kâwm a; Aizawl-Lunglei-Thenzawl World Bank kawng siamtu contractor chu hna ṭha taka thawk tura hrilh tura Chief Minister an ngenna lehkha an pe.

Contractor hian thil an siam reng rengin a siam zawha an kalsan mai a thiang lo a, enkawl zui tur hun bituk an nei a, chumi hun chhunga a chhia a awm a nih chuan an mawh a ni. He kawngpui siam ṭhat pawh hi tunah hian a chhe leh tawh hle a, kum 2023 March thlà thleng hi chuan a chhiat ṭhatah contractor hian mawh a la phur zui zel a ni.

Kan rama kawngpui pawimawh ber pakhat siam ṭhat hna kalpui danah contractor-te ngen tura Chief Minister hnena lehkha thawn a ngai ta teh daih mai hi thil danglam tak a ni a, YMA lamin lehkha kengtu atan an MLA-te an hmang kher hian ngaihtuah a tithui viau bawk.

Kan rama kawngpui siamtu tur contractor-te hi an contract-a inziak ang ni loa hnathawhtir an tum pawh a ni lo a, an contract-a inziak ang thlapa thawk zui tura ngen tur pawha Chief Minister pun a ngai ta hial mai hi chu a zia lo ngawt mai. Chutihlaiin YMA lamin an duh ber chu kawngpui ṭha tak neih a ni a, chumi kawngah chuan an MLA-te kaltlanga Chief Minister hnena lehkha an thehluh hian awmzia a neih theih hlauh chuan thil lawmawm tak a ni ang.