Bawlhhlawh paih, Sorkar, AMC leh mipui

Save Mizoram Rivers chuan Sairang leh Khamrang inkara bawlhhlawh paih ru ṭhinte man chhuahna tura ṭanpuitute chu lawmman pek an tum thu an puang a; Aizawl khawpui tui tlan ber Tlawng lui humhalh chu an ngaih pawimawh hmasak a nih thu a sawi.

Aizawl khawpui mi ngei, mahni tui tlan tibawlhhlawh thei zawnga a ruka bawlhhlawh paih duhtu an awm zel mai hi a van­duaithlak a, kawng lehlama thlir phei chuan mahni inhrai pawh kan ang lek lek a ni.

Khawpui daia hmun fianrial deuhah chuan a ruka bawlhhlawh paih duh mai zel hnam kan ni ta hi a zahthlak a, kan sim a ṭha hle a ni.

Bawlhlawh paih ruk ven kawngah hian sorkar tan pawh ven sen a ni lo ang a, chutih rualin mipui kutah dah mai loin sorkar ngei pawh hian tun aiin ṭan la deuh se a ṭangkai thei ngei ang.

AMC pawhin an huam chhunga bawlh­hlawh paih ruknate hi tun aia khauh zawkin vil se, local council-te nen ṭang kawpa ṭan lak theih dan ngaihtuah rang se a lawm­awm ngawt ang.

A pawimawh ber chu mipui kan ni a, tute'n emaw min ven loh avang ngawta duh duhna hmuna bawlhhlawh paih mai hi sim a hun. Kan ram neih chhun a lo thianghlima a chhunga chengte kan lo hrisel zawkna turin kan bawlhhlawh paih danah i fimkhur tlang ang u.