Grape wine

Chief Minister hoa Council of Minister ṭhukhawm chuan grape wine siam phalna tur dan (rules) a pawm. Excise & Narcotics department aṭanga lut, The Mizoram Liquor (Prohibition) Draft Rules an ngaihtuah a, sawiho a nih hnuah an pawm. MLP Rules duanah hian, Mizorama grape hmanga wine siam leh zawrh phal rawt a ni a; pawm a nih tâk avangin Champhai leh Hnah­lan winery-ah dan hnuaiah grape wine siam leh zawrh theih a ni dawn ta a ni.

Grape wine chung­chang hian sawi a hlawh hle mai a, sorkarin 'inhriatthiamna' angin zawrh leh hralh hi a phal reng a, dan lamah erawh chuan phal loh a ni reng ṭhin. Hetianga inhriatthiamna nena zawrh leh hralh a nih meklai hian Millennium Centre leh a chhehvela grape wine zawrhte chu tlem lai deuh khan sorkarin a man chiam mai a, hei hian inhnialna nasa tak a chawk chhuak zui nghe nghe a ni.

Social media lamah nasa takin sorkar demna a lo lang a, sorkar chu grape wine chungchanga dinna mumal nei lo ang hiala puh a ni a, sorkar hotute thusawi pawh a inmil loin a inkalh chang a awm fo reng a ni. Grape wine mansak leh a kal zel danah sorkar a hmingchhia a, mipui hawi lam a chiang chho zui a, tunah chuan sorkar pawhin thu thar a rawn nei ta.

Hman ni lawkah MLP Rules duanah grape wine siam leh zawrh phal a ni lo a, hmun ṭhenkhata chaw (food item) ang maia zawrh leh hralh khap a ni ta hian sawisel a hlawh hle. Tunah MLP Rules chu tihdanglam a lo ni ta a, hei hi Champhai district lama grape chingtute tan chuan thu lawmawmk tak a ni ngei ang.