Sorkarin thil theih loh a tiam em ni?

BJP, Mizoram Pradesh chuan thuchhuah siamin, cheng nuai 3 sem tiamtu MNF sorkarin SEDP hnuaia sum an sem tur Rs 50,000-ah an tihhniam hnuah Rs 25,000-ah an tihniam leh chu mak an tih thu an tarlang a; Rs 25,000 aia tlemah tawlh tawh lo turin sorkar an ngen.

Mizoram BJP chuan, minister ṭhen­­khatin Rs 3,00,000 an sem hma chu an sem chhun­zawm zel dawn anga an sawi chu thinrimthlak an tih thu leh mipui thluak sûk tumna a nih thu an tarlang a, "Mizoram mipui zahlohna lian takah kan ngai," an ti.

MNF-in an sorkar hmaa an tiam chu chhung tin hnena Rs 3,00,000 sem a ni. MNF President sawi dan phei chuan he pawisa hi Congress hunlaia NLUP lo dawng tawhte pawh pek vek an tum tih kha a ni a. Chutihlaiin tunah chuan Rs 25,000 chiah an sem dâwn a, hei hi kum 2018 inthlan hmaa an intiamna nen chuan a inthlau ta hle a ni.

MNF hruaitu zingah Rs 3,00,000 sem a nih tur thu leh a pawisa hmuhna lam a harsat loh thu sawi ṭhin an awm a, tuna an sem mai loh chhanah hian Covid-19 hripui leng an puh deuh ber. Hripui avanga pawisa hmanna mipuiin an hria a, hripui avang veka kan pawisa dawn tur sâ ni lo ṭanpuina sum lo lut leh mipui thawh khawm zat pawh hriat a ni bawk.

Kan sorkar hian Rs 3,00,000 sem theih loh chhuanlama Covid-19 a hmang leh, Rs 25,000 chiah sem a tum ta mai hi mipui zahlohna rawng a kai thei a, chumi piah lama pawisa awm lo chunga Rs 3,00,000 la sem tur awm anga mipui a beiseina siam hi mipui bum tumna a ang ta lek lek mai.

Kan rama chhungkaw awm zat leh kan state budget pumpui chhut hian hripui pawh lêng lo se Rs 3,00,000 sem hi thil theih niin a lang lo a, chhuanlam siama sawi mam ringawt hi a fel lo a, sorkar hian thil theih loh min lo tiam reng zawk a ni lo maw?