Youtuber an fimkhur a ngai

Mizoram State Commission for Protection of Child Rights (MSCPCR) chuan tun hnaia naupang chunga pawi khawih­na thleng chungchang You­tube-a dahtu channel pahnih enkawltute chu MSCPCR pisaah koin an zilh a, ti tawh lo turin an vaukhàn.

Heng Youtube channel-te hian naupang kaih­hnawih pawikhawih­na thlenga naupang kum tling lo hming leh nihna an puang­zar a, MSCPCR chuan hei hi dan kalh a nih thu hrilhin tun hnuah chuan fimkhur tur leh dan bawhchhe lo turin an hriattir.

Khawvel hmasawn zelah thil thar kan la hmelhriat ngai loh a chhuak zel a, tunah chuan YouTube-te hi mi ṭhenkhat eizawnna a nih tawh mai bakah mipui nawlpuiin kan en/ ngaihthlak nasat ber pawl a ni ta. Radio leh tape recorder hlutlai a awm a, cable TV a lo lut leh a, chanchinbu lamah print media hmasawnna lian tak a awm chho a, tun hnaiah chuan 'new media' an tih hnuaiah media chi thar a chhuah belh ta zel a ni.

Inzirna nei lem lo leh a dan leh hrai lam hre lem lo mi tam takin social media lam an vil nasa a, mipui hip duh luatah ram leh hnam tana pawi thei pawh thliar loin an chhuah bawrh bawrh a, a dan lam an hre tawk lo bawk nen harsatna hi kan la tawk dâwn chauh pawh a ni thei.

Hei vang hian Youtuber kan tih mai YouTube channel enkawltute hi an fimkhur a ngai a ni. Thlirtu duh luatah a dik leh mawi an thliar thiam lo fo a, an thil tihchhuahah mawhphurhna lian tak an nei tih hre chungin fimkhur takin inzir zel se a ṭha hle.