Lawmna lawmawm lo
Mizoram Police-te hian hian June 24, 2022 khan ruihhlo hâl rûnpui an buatsaih a, ruihhlo kg. 930.229 an hâl a, chu chu international market-a Rs 23,62,09,40,245 hû a tling. Police-in ruihhlo an hâl ral hi ṭum khata an ruihhlo tihralna lian ber a ni.
Nungcha tawlh rûk manna lian tham ber, nungcha 468 manna nen Mizoram Police chu World Book of Records 2022 Gold Editions pahnihah a lang. Chief Minister chuan, Mizoram police-te World Book of Records-a an lang chu a lawmpui thu a sawi.
Mizoram Police-te hnathawh ṭhat Chief Minister-in a lawmpui hi a tih tur dik tak a ni a, Police-te pawh an thawk ṭha hle tih an thil man zat aṭangin a lang chiang hle. Chutihlaiin hei hian Mizorama smuggling hluarzia a tilang chiang bawk a, sorkar phal loh thil hi hlawm lian takin kan state paltlanga kalpui a nihzia a nemnghet nghal bawk.
Ruihhlo bîk hian kan ram hi a paltlang a ni satliah lo a, kan ramah ruihhlo a zalen ta hle a, ṭum dang zawng aiin lei a awlsamin a man pawh a tlawm tawh zawk niin an sawi a, a vanduaithlak takzet a ni.
Khawvela lang tham khawpa state tereuhtein ruihhlo kan hal ral hnem hi a thawktute thawh ṭhat lam chu lo dah ṭha ta ila, thil zahthlak tak a ni zawk. Kan ramah heti khawp hian ruihhlo a tamin a zalen ta a ni a, heti zat man tur a lo lut thei ringawt pawh hi a fel lo tawh a ni.
Sorkar a ṭan lehzual a ngai a, Mizoram Police pawhin ruihhlo lut sâ man piah lamah a lut tur ven thlengin beihpui an thlak a ngai tih tun hnaia thil thleng hian a lantir thei awm e.