Lockdown kan puang a nih chuan Khauh takin kengkawh ṭhin ang u

Mizoram sorkar chuan June 22 - 30 chhung chu total lockdown a kalpui chhunzawm zel dawn a, hei vang hian Aizawl Municipal Corporation (AMC) area, dis­trict headquarters leh sorkarin containment area a puan chhungah chuan phalna nei lote mahni in leh compound chhuahsan khap a ni a, lirthei lak chhuah phal a ni lo. Hetihlai hian phalna neia dawr hawn phalsak, hnathawh phalsak leh eizawnna kalpui thei chinte siam a ni. 

Mi tam takin, "A ṭul tawh em em lo e," tia an sawisel chunga sorkarin total lockdown a la kalpui zel chhan hi a fimkhur vang te, mipui an himna tur leh Mizoram mipuite tana ṭha zawk tur an ngaihtuah vang a ni ang. Sorkar lam hian inkharkhip avanga kan hloh tur zawng zawng a hre vek a, chhungkaw tam takin ei leh barah harsatna an tawk tawh tih thlengin a hrethiam a, chuti chung chuan kan dinhmun thlirin June thla tawp thlenga inkharkhip hi ṭul a la ti a, a kal tlangpui ta zel a nih hmel.

Hetia inkharkhip hi kan kalpui ta zel a, mi tam tak eizawnna chhunzawm thei loa kan siam a nih law law chuan, kan inkharkhp hi a nih tur ang taka kalpui a ṭul khawp mai. A hming maia inkharkhip a, sumdawnna tam tak kharsak a, eizawnna tam tak chhunzawm theih loha kan siamlai hian, kan inkharkhip chhan mipuite pawnah an tei chhuah leh suau suau chuan inkharkhip awmze nei loah kan chhuah ang tih a hlauhawm hle.

Mipui an vei nuai nuai loh a, inkar hlat taka kan awm a, mihring leh mihring kan inpawh loh a, puipunna kan tihbo hian nasa takin hri veng tur kan veng thei a, chu chu hriain sorkar pawh hian dodalna leh sawiselna a awm nasa tawh chungin inkharkhip hi a la kalpui zel. Nimahsela Aizawl khawpuiah chuan chhuanlam hrang hrang avang leh ṭulna hrang hrang avangin traffic jam khawpin lirthei a chhuak tam tho a, khawlaiah mipui veivak an pung leh ṭan tawh a; mi eizawnna tibuai tur khawpa lockdown kan puang a nih si chuan, kan puan chhan mipui vaivak tur khap tur leh, lirthei tlan tam lutuk titawp tur hian sorkar hian a tih tur a tih ngei a ṭul a ni. 

Inkharkhip puan leh mai hian sorkar hnathawkte hlawh chu a ngai reng dawn a, nitina ei bar zawng ṭhin te, sumdawngte leh eizawnna hrang hrangah mi tam takin an hloh nasa hle. Chutiang kan thlen nawntir mek laia a mipui ber khawlai leng hmuh tur kan tam zel tho a, lithei tlan an tlem phah bawk si loh chuan kan inkharkhip chhan kan ṭhelh duai ang tih a hlauhawm a. Inkharkhip puang nawntu lam hian khawlaia mipui leh lirthei veivak titlem tur hian a takin khauh takin bawhzui rawh se.