Kan ram venhim kawngah Sorkar ṭang deuh se
Kumin August thla chhungin Mizoram Police-te chuan ruihhlo chi hrang hrang cheng nuai 4,600 chuang hu an man a, hei bakah hian Myanmar aṭanga lo lut kuhva rah ip 749 an man bawk; ruihhlo an man zinga a tam zawk hi Champhai District chhunga man a ni.
Kan ram dinhmun dik tak kan thlir dawn chuan a chhunga sorkar phal loh thil lo lut tamzia aṭang hian thui tak chu a thlir theih ang. A duh tan chuan he ram chhungah hian ruihhlo hi awlsam takin a la lakluh theih reng tih thil chiang tak a ni.
Kan Police-te thawhrim zarah ruihhlo tam tham tak man a ni hi a lawmawm a, chutihlaiin heti zat a lo lut hum hum reng mai hi chu ramri ven kawngah Police lam an ṭan a ngai a, Assam Rifles-te an duty a nih pawhin tun aia ṭan la zual turin Mizoram sorkar hian a nawr thei tur a ni.
Tuna a lan dan chuan he ram hi zalen taka ruihhlo tawlh theihna ramah a chang ta a ni deuh ber a, heti zat ruihhlo man hi ngaih tihṭhatna tur lam ni loin ngaih ṭhat lohna tur zawk a ni a, "Ruihhlo hi man loh engzat nge awm ang?" tiin kan inzawt zawk tur a ni ang.
Engpawhnise kan ram ṭhenawmte dinhmun en hian ruihhlo leh sorkar phal loh thil dang hi rawn tawlh luh an la tum zel dawn tih a chiang a, tun ang em ema awlsama a lo luh tawh lohna turin sorkar hian hma thar la se.
Mizoram chhungah YMA nen ṭawngkawpa ruihhlo do a ṭhat rual hian a lut tur ven kawngah hian tun aia ṭan lak a ṭul takzet a, Mizoram sorkar hi ram venhim kawngah a ṭan lehzual a ngai a ni.