Health department sum audit

Health Minister-in thuthar thehdarhtute a kawmnaa tel, Finance commissioner chuan, Covid-19 dona atana Health department sum hman dan endik (audit) a nih chungchangah politics thil a awm loh thu thuthar thehdarhtute zawhna chhángin a sawi a, "Nakinah AG lamin an audit huna an buai lohna atana tih a ni. Political motive thil engmah a awm lo a, invènpuina thil a ni," a ti a, "Department-te hi audit vek tur an ni a, thawktu indaih- lohna avangin kan audit thei lo zawk a ni," a ti bawk. 

Health department sum audit hi dan ang taka kalpui a ni a, sorkar official lamin an sawifiah tawh bawk a, pawm tur dang a awm loh avangin sorkar hotute sawifiahna pawm hi a hahdam ber ang. Finfiahna leh behchhan tur mumal tak awm si loa politics thil nena hmeh bel tum ṭalh an awm a; Congress party chuan Health department sum audit a nih chuan Disaster Management & Rehabilitation department leh Home department sum hman dan pawh audit ve an phût thu an lo sawi ve mek bawk.

Ngaihtuah ngun ngai lai erawh chu sorkar department zawng zawng hi audit theih vek an ni a, thawktu indaih loh vanga audit loh mai an ni a; Covid-19 avanga kan buai vanglai taka a department zinga buai ber Health department kher an han audit hi a ni. Politics thil nen hmehbel a, a ngai kawi duhtu tana ngaih kawih theih remchang tak a lo awm bawk si hian titi chu a siam ta deuh a ni. 

Hetianga Health minister press con­ference daih ni sia Finance commissioner an sawm tel hian mi ṭhenkhat mak tih a hlawh deuh a; Covid-19 hri leng do dan chungchang sawi tur a nih laia a sum lai bawrin sawi a hlawh chho leh, a sorkar thuneitu lamin press conference-a Finance department hotupa an kaltir hi chu thil thleng khât tak a nih a rinawm. Engpawhnise sum kal dan endiktu an awm a, an endik hnua an hmuh dan hi hriat a ni lo a, politics thil a inphum lo an tih chuan mipui pawhin awih mai ila a hahdam ber awm e.