Hmanhmawh taka sorkar lirthei lei

Chief Minister hman tura tun hnaia Jeep Compass hman­hmawh taka lei a nih chhan chun Chief Minister-in Assembly House-ah a sawifiah. Department Vehicle Purchase Board (DVPB) pawh paltlang loa pawisa pe lawka lei a nih chhan chu a lirthei kawl lai pakhat chu "Tihngaihna a awm tawh nang lo," nia sawiin, "Kawng chhoah te nawr a ngai," a ti.

Kan ram hotupa berin kan ram rorel­na in sang berah dan pawh zawh famkim hman loa DVPB phalna pawh la hmasa loa hmanhmawh taka lirthei lei chhan a sawi fiah tawh a. Awih loh emaw, a dik loa lo ngaih sak ṭalh emaw a fel lo ang a, chutihlaiin zawhna tam tak a awm thei awm e.

Mizorama mi pawimawh bera chhal ngam lirthei kawl lai a lo ṭâwng chhe hman lutuk hi thil fel lo lian tak a ni a, hei hi a lirthei enkawltute leh GAD lama lirthei changtute thleng pawhin an dem theih ang. Chief Minister dinhmuin pawimawhzia kan hria a, chutih laia Chief Minister hman tura kawng chhoa lirthei nawr ngai leh 'kal thei ngang lo' lirthei an lo chhawp hi Chief Minister himna (security) atan pawh a hlauhawm thei a, an demawm hle a ni.

Tunlai lirtheite hi a ṭhain a tlo tawh a, kawng chhoa nam ngai leh kal thei tawh ngang lo hi chu a awm khat tawh hle a; chutihlaia kan Chief Minister lirthei ni si hetiang khawpa dinhmun chhiaa an dah hi CMO office-a thawktute pawh an demawm a, hetiang dinhmun a thlen hma hian a thlakna an ngaihtuah tur a ni ang.

An chet muan luatah hman­hmawh takin CM lirthei tur lei thar a ngai a, a kal thei ngang tawh si lo a, tihngaihna a awm tawh ngang loh avangin DVPB remtihna pawh la hmasa loin hmanhmawh takin lei a ngai ta niin a lang.