Police an thawk ṭha e

Mizoram khawpui ber Aizawl leh district headquarters hrang hranga total lockdown kalpui mekah Aizawlah police-te'n lirthei chhuak turte uluk takin an endik a, hmai tuamna (mask) vuah loa khawlai lengte pawh manin pawisa an chawitir ṭhin bawk. 

Mizorama Co­vid-19 a darh zel lohna turin June 22-30 chhunga lockdown kalpui dan tur sorkarin a chhuah thar angin Aizawl khawpuiah phalna nei lo lirtheite chu pawn chhuah khap a ni a, lirthei veivakte police lamin hmun hrang hrangah uluk takin an endik. Zêp thu a chêng lo a, kan police-te an hah rimtawngin an indaih lo ve deuh pawh a ni a, eng emawlai kha chuan lirthei tei chhuak kha endik lohin an duh duhin an veivak hman a ni ber mai. Tunah erawh chuan lockdown puan chhan ang ngeiin police lam pawhin ṭan an la ta niin a lang a, a lawmawm hle. 

Hetihlai hian Aizawla rua­hmanna fuh tawk lo deuh chu Traffic Police office lam aṭanga lirthei chhuah phalna lak tura rel hi a ni a, khawpui a lian si a, mihring an ṭhahnemin ṭul bik thil nei ringawt pawh buaipui tham an tling. Lirthei chhuah phalna dil turin thui tak tak kal a ngai a, a hmunah mipui an intlar pût a, kan ven leh hlauh ber Covid-19 inkai darh theihna turin an awm khawm leh bawk si a, rorelna ennawn ngai zinga mi a ni awm e.

Covid-19 zet zawng do a hautakin a harsa em em a, kan vawi khat tawnna ṭheuh a nih avangin tih fuh vek sen pawh a ni lo. Sorkar lam pawhin thil dik leh ṭha zawk tura an ngaihin an rel a, a fuh lo leh fel lo a awm hi chuan rel ṭhat leh emaw, thu sût leh hi hreh lo se a ṭha awm e.

Engpawhnise Lockdown 7.0 an puan leh takah hian police-te pawh an taimain an thawk ṭha sawt niin a lang a. Sorkarin lockdown a puang leh rau rau a nih chuan, a dan siam kengkawh turin police lam hi khauh takin ṭang zel se a ṭha mai awm e.