Fisheries department leh GAD lirthei lei loh leh lei chungchang

Fisheries Minister chuan Mizoram sorkarin lirthei lei chungchangah khuahkhirhna a siam avangin lirthei thar an lei theih loh thu Assembly House-ah a sawi a; he thu hi Champhai Fisheries department office-in lirthei an neih loh avanga harsatna an tawh thu a sawifiahnaah a sawi lang a ni.

Hetihlai hian Assembly House-ah vek hian General Administration Department (GAD) chuan Chief Minis­ter hman atan Jeep Compass chu Departmental Vehicle Purchase Board (DVPB) remtihna pawh la hmasa loa an lei thu Assembly House-ah sawi chhuah a ni a, kum 2019 khan minister-te lirthei hman tur cheng nuai 316.36 senga lei a lo ni tawh bawk.

Mizoram sorkarin lirthei lei chungchangah inrenchemna an kalpui hi a lawmawm a, hei hi rualkhai taka kalpui theih ni se a lawmawm hle ang. Department ṭhenkhatin lirthei an lei theih laia hmun ṭhenkhatah mamawh ngawih ngawih pawhin lirthei an nei lo hi a fel lo a; hnathawktute hlawha kan sen zat ngaihtuahin lirthei neih loh avanga hna­thawk thei loa an awm hian sorkar tan hlohna a ni zawk thei.

Lirthei lei hrim hrim hi tawngpawng khap bur lam aiin mamawhna hmunah chuan lei theih tura rua­hmanna siam a finthlak ang a; sum nei lo chunga lirthei lawm lutuk a fel lo a, hnathawh harsa khawpa lirthei neih loh pawh a fel bik lo ang.