Grape wine man takte kha
Excise & Narcotics department (END) Minister chuan May 27, 2022-a Millennium Centre aṭanga grape wine mante chu tih zui dan tur ngaihtuah a la nih tur thu a sawi a; Grape Wine Rules tihfel a nih hnuah grape wine an mante chu tih dan tur ngaihtuah a la nih tur thu Assembly House a hrilh.
Tun hnaiah Mizoram sorkar hruaitute ṭhukhawm chuan Mizoramah Grape wine siam leh hralh phalna tur an pawm ta a, Champhai district lama kuthnathawktute tan chuan thil lawmawm tak a ni ang.
Hetihlai hian grape wine siam leh zawrh hi danin a phal loh lai pawhin 'inhriatthiamna' angin kalpui a ni tho a, Champhai district lamah grape wine siam hna an chawl lo a, sorkar pawhin a ngaimawh hran lo a, man pawh a man ngai lo a ni. Aizawl leh khaw hrang hrangah heng grape wine-te hi zawrh chhuah a ni a, hei pawh hi dan hnuaia zawrh ni lem lo mah se sorkar pawhin a ngaimawh hran lo a, zalen takin dawr hranpa luah meuhin an zuar ṭhin.
May 27, 2022 khan thil danglam tak thlengin Millennium Centre-a grape wine zawrhte chu sorkarin a ngaimawh thut a, an man khawm ta chiam mai a ni. Dawr lian deuhah chuan cheng nuai tam tak man an man hial a ni. Heng grape wine-te hi a hma zawnga zalen taka zawrh a nih mai bakah a siamna lam leh a phurh luhna lam pawh sorkar hian a ngaimawh lem lo a, tute emaw rawt thut avanga mansak thut niin a lang.
Tunah lem a sorkar berin grape wine siam leh hralhna dan a siam leh dâwn ta si a, hei vang hian May thlaa grape wine an mansakte pawh hi sorkar hian pe kir leh ngei rawh se.