Chakai farm leh Mizoram
Fisheries department-in Kolasib district-a pilot project anga chakai farm an kalpuiah cheng nuai 37 sen a ni tawh a, chakai hralh chhuah a la awm lo. Tun dinhmunah hei hi project anga kalpui zel tlak a nih leh nih loh hriat theih a la ni tih Fisheries Minister chuan Assembly House hrilh.
Sorkarin chakai farm kalpui duhna a nei hi thil lawmawm tak a ni a, an beisei angin hlawhtling ta ngat se chhungkaw tam tak tana eizawnna siam theitu a ni thei ang. Mithiamte nen ṭangkawpa chakai khawi pun tumna a awm hrim hrim hi hmasawnna a ni a, a hlawhtling ta lo a nih pawhin an tumna chin pawh hi thil lawmawm tak a ni.
Hetihlai hian chakai farm hrim hrim hian mi ṭhenkhat nuih a tiza tawh a, tute'n emaw uar taka an lo sawi tawh a tak ram la chang lo a nih vang hian sawi nuam pawh an ti hle niin a lang. Hetihlai hian sangha, ar, vawk, bawng leh ran dangte pawh hlawhtling taka enkawl theih an nih chuan, a tih dan kan man fuh hunah chuan chakai farm pawh hi kan la hlawhtlinpui theih i beisei ang.
Chutihlaiin cheng nuai 37 zet sen a nih hma hian zirchiannate an nei lo a nih chuan a fel lo a; zirchianna nen mithiamnte'n an kalpui a nih chuan a hlawhtlin hun hi i nghak zel phawt ang.