Sorkar ngaih pawimawhte

Congress party chuan Mizoram sorkar chu sum harsatlai pawha duhsak zawngte hnena awlsam taka sum pe chhuak rengah a puh a; damlo pawisa cheng vaibelchhe 70 chuang a bat meklaiin Kamlova Chhangte (Kamrul), Chief Minister laina hnai leh duhsak zawngte bakah NECS leh mi ṭhenkhat dangin awlsam taka pawisa tam tham an lak chhuah theih reng thu press confe­rence-ah an sawi.

Congress party lam tarlan danin Kamlova Chhangte bill pathum, a belhkhawma Rs 9,01,40,000 (vbc. 9.01) chu bill thehluh niin Siaha Treasury-in an pe chhuak a, ani bill vek hi bill dang cheng vbc. 9.92 chu chawlhkar khat chhungin Siaha Treasury-in a pe chhuak a; October 17, 2019 leh March 15, 2022 inkarah Kamlova bill 13 zingah thla khat aia rei táng a awm lo a ni.

Bill 13-a sum zat chu Rs 30,75,17,337 (vbc. 30.75) a ni a, hei bakah hian Kolasib Treasury chuan Kamlova bill Rs 8,75,17,337 a pe bawk.

Chief Minister laichìn Zoramchhana bill pahnih - cheng vbc. 8.84 chu bill thehluh ní-ah Aizawl South Treasury-in a pe chhuak a, ama bill vek bill dang pahnih, cheng vbc. 3.65 pawh ni thum chhungin pek a ni a; Treasury hrang hrang dang aṭangin Zoramchhana bill Rs 25,23,83,383 pek chhuah a ni bawk.

NECS bill te, MLN Projects bill te, F Lalliansanga bill te, Tantia Constructions bill te chu bill thehluh ní-ah pek chhuah a ni a; kum 2022-a Jedidia Enterprise bill pangate chu bill thehluh ní leh thehluh tûkah pek chhuah vek a ni; a vaiin Rs 8,97,81,813 a ni. Congress chuan Health Minister leh Jedidia Enterprise hi an inkungkaih hnai hle niin an puh bawk.

Sorkar hian sum awm loh thu a sawi chungin thil pawimawh bik nia a ngaihah chuan sum a hmang lo thei lo a, hmasawnna hna thawh a nih miau avangin bill ṭhenkhat chu hmanhmawh taka pek chhuah zung zung ṭhin a ni.

Mizoram sorkarin sum harsatlaia rang taka bill a pek chhuahte chu RTI Act hmangin eptu party lamin an rawn hai lang leh ta a; sum harsatlaia sorkarin a ngaih pawimawhte chu ziakin chiang takin tarlan a ni e.