Thiamna nena lo neih

Mizoram University hnuaia Department of Forestry chuan tun hnai khan loneitute pualin, 'Sustainable farming techniques in Mizoram' tih thupui hmangin national workshop an buatsaih a, he hunah hian mithiamte'n Mizorama hlawk zawka thlai thar theih dan turte leh kuthnathawktute hamṭhatna tur hrang hrang an zirtir.

Mizorama kan lo neih dan hi ngun taka kan chik peih chuan hmasawnna hi a tam lo hle mai a, pi leh pute hunlai aṭanga kan kalpui tlang ram lo neih kan la bansan thei lo. Khawvel ram tam takin ṭha lo an tih lo hal zet hnua buh leh thlai chin kan la kalpui a, kan ram nga kan vat chereu zo a, kan tui hna a kang chat zo hnai tawh a, kan tuar hle tih a lang reng.

Hetihlai hian tlang ram lo neih bansan thei tur khawpa ruahmanna ṭha kan ramin a la nei lo a, lo neitute'n lo vah leh lo hal hahthlak tak an kalsan theihna tur sorkarin a la kawhhmuh thei lo. NLUP-ah sum tam tak sen a ni a, kan lo neih dan a la ngai reng a, SEDP pawhin chumi thlakna lam chu a la hawi chuang lo a; ram dangin an tih theih tlang rama lo hal kher loa lo neih dan ṭha kan ramah kalpui a la ni lo.

Sorkarin sum tam tak sengin hmun bikahte project hrang hrang a kalpui a, sum chang tur thlai chintirna hmun nei bawk mah se tlang ram lo neih bansana tur khawpa ruahmanna ṭha a la awm lo a, mithiamte nena ṭanghoa a ram pum huapa hmalakna tak tak kan la nei thei lo tih hi phat rual a ni lo.

Vawi leh khatah danglamna thlen thut theih a ni ngai lo a, mithiamte nena zirhona tam zawk hi buatsaih ni se, sorkarin ruahmanna fel tak nei bawk se, kan ramah hian ram dangte angin hlawk zawka lo neih dan hi a awm ngei tur a ni.