State sum dinhmun

Mizoram Legislative Assembly speaker chuan Covid-19 avangin Assembly special session koh ṭulna a awm loh thu sawiin, "Session hun pangngaiah session hi koh a ni ang," a ti a; state sum dinhmun chungchang sawiin, "India ram sum dinhmun hi GST a luh ṭhat loh avangin a buai nuai a ni ber. Chuvangin, tute state tan mah kan sum hmuh tur a chiah chiahin a sawi theih loh," a ti.

Mizoram chief minister leh Finance minister chuan Mizo­ram sum dinhmun a sawi theih loh thu thiam takin a sawi chhuak tawh a, "Pathian chauhin a hria," a tih avangin a thusawi hian sawi zui a hlawh hle. Tunah Assembly Speaker-in state sum dinhmun sawi theih a nih loh thu a rawn sawi nawn leh ta a, kan state sum dinhmun tur hi kan hre dawn lo a ni ang tih a rin theih.

Mipui lam hian kan sum hmuh tur zat dik tak, kan sum hmuh tur chiah chiah leh kan hman dan kimchang hriat hi an phût berin a lang lo a, "Sum leh paiah kan state hi a thlaphang em? Ṭam thei mai dinhmunah kan ding em?" tih lam hi an hriat duh zawk chu a nih hmel a, kan sorkar hotu lute hian thil hi a harsa zawngin an sawi lui anga puh mai an awl dawn khawp mai. 

State mai ni lo, ram pumin sumah harsatna a tawk a, hri lengin economy a nghawng a, sorkar laipui suma innghat state kan nih avangin ram pum economy tlahniam tuartu tur zinga mi kan ni. Hei avng hian mipui zinga vengva deuh chuan kan state hi kan ṭam mai emaw, ei leh barah harsa kan tawk mai te an hlauthawng a, chumi ki aṭang chuan kan state sum dinhmun hi an ngaihven a nih hmel. 

Hemi piah lamah hian kum tir lam thleng khan sum tam thu uar takin kan hotu­te'n an lo sawi ve bawk nen, sum hi a la tam tak tak nge tam tak tak lo, tih kha mipui zawhna ber pakhat a ni hmel. 

Engpawhnise tunah chuan kan state sum dinhmun dik tak hre lo mah ila sumah kan harsa tih erawh kan hre thei ta a, sorkar hnathawk hlawh pawh sorkarin a ba/ hmang ṭhen ta hial a ni. Hetiang dinhmuna kan din meklai hian, budget kan bihchian chuan sorkar hian  sum hman loh hlawm lian pui pui hi a la kawl ṭha khiau niin a lang a, 'Heti chin hi Covid-19 dona atan pawh pên theih a ni a, hei hi chu a thiang lo,' tia ziak a awm lem lo bawk a, sorkar hnathawk hlawh hial pawh pen a nih tawh bawk si chuan 'sum la kawl ṭhat khiau' lam pawh hi pûk ṭhen ve mai a ṭha tawh lo maw?