AMC Councillor-te hman tur sum

Aizawl Municipal Corpo­ration (AMC) Councillor-te chuan kum 2022-23 atana an hman tur ward development fund an la dawng lo. He pawisa hi sorkar laipui aṭangin Mizoram sorkarah pek a ni tawh a, Mizoram sorkar hian AMC-ah sum hi a la pe lo a; a pek chhuah tlai avangin Mizoram sorkar hian AMC hnenah penal interest a chawi a ngai dawn a ni.

Sorkarin sumah harsatna a tawk tih chu mipui nawlpui pawhin an hre chiang ta a, a hnuaia hnathawkte hlawh pawh a hun takah a pek chhuah theih ngai loh avangin thup rual lohin suma buaina hi a lang chiang a ni.

Hetihlai hian kan sorkar tho hian thil ṭhenkhatah sum nei ber ang maiin hna a thawkin a ngaih pawimawh zawngte tan chuan ni khata bill tam tham pawh lehlan theiin sum hi an pe chhuak thei reng tho a. Minister ṭhenkhat phei chuan Covid-19 avanga hnathawh ṭhulh an tum loh thute thlengin an aupui a ni.

Thawh chhuah sawi tham nei lo state kan nih avangin sorkar tan pawh pawisa indaihzai taka hman hi thil harsa a ni ang a, a pawi ber chu awmze nei thama inrenchemna lam kan kalpui tel lo hi a ni. Hna ṭul ber ni lem lo chi thawh kan chawlhsan lo a, sorkarin lirtheite a la lei zel a, mahni hnathawkte hlawh tur a huna pek chhuah a harsat em em bawk a, hemi piah lama AMC councillor-te hmasawn­na hna­thawhna tur sum an la hreng tel hi chu a zialo khawp mai.

AMC sum tura sorkar laipui rawn pek chhuah hi a huna pek loh chuan chawi (penal interest) a awm a, kan sorkarin chawi huama AMC pawisa a kawl tâng reng mai hi chu a zialo ngawt mai.