Lirthei khu kan ngaimawh takzet em?

September 1, 2022 aṭangin Mizoram sorkar chuan Motor Vehicles (Amendment) Act, 2019 a hman hnuah Mizoram Pollution Control Board (MPCB) hnuaiah lirthei khu endiktirtu an pung hle a, August 22-30 chhungin mi 4,599-in an endiktir hman a ni.

MPCB hotute sawi danin lirthei khu endiktir tura tih ni ṭhin mah se Traffic Police lam an khauh deuh lai a nih loh chuan endiktir hi an tlem ṭhin hle. Tunah erawh phal baka a khu tichhuakte chawi tur Rs 10,000 a nih tak avangin endiktir an pung hluai a ni.

India ram khawpui ber Delhi-te chu mei khu, lirthei khu leh thil khu dang avangin an buai a, boruak a bawlhhlawh avangin hriselna atana hlauhawm khawpin a awm a ni. Hei vang hian lirthei khu an khuahkhirh na hle a, diesel engine hmang lirtheite phei chu kum 10 bak hman an phal lo a, kum 10 a tlin chuan tlan an phalsak tawh lo.

Delhi-te nena tehkhin ralah chuan Mizoram boruak hi a la thianghlim hle a, chutihlaiin anni nena dan thuhmun vek hman tura duan a nih avangin lirthei khute pawh endik a ngai a ni. Hetihlai hian Mizoramah lirthei hlui tawh tak takte pawhin pollution test hi an paltlang thei zel a, hei hi zir chian a ṭha khawp mai.

Aizawl khaw­puiah City Bus hlui leh khu chhuak nasa tak takte an la tlan kual reng thei a, khawpuia an service ngam chuan a khu endikna lam an paltlang a nih ngei hmel.

Lirthei khu endik tur lam aiin a endikna pawisa chawi tur lam hi kan ûm lutuk palh thei a, lirthei khu endik chhan hi boruak thianghlim kan duh vang a nih kha i hre reng ang u!