Chief Secretary atan Mizo ṭawng thiam

Chief Minister chuan tun hnai khan New Delhi-ah Prime Minister Narendra Modi chu a chenna inah a kawm a, Mizoram mamawh hrang hrang a thlen a, a thu thlen zingah Chief Secretary atan Mizo ṭawng thiam ngei pe tura ngenna a tel.

Mizoram sokar hian hun rei tak chhung chu Chief Secretary atan Mizo ṭawng thiam ngei dilin sorkar laipui a dawr tawh a, a la hlawhtling lo. NGO Coordination Committee phei chuan tuna kan Chief Secretary hi a pisa kai tur dan a, Mizo ṭawng thiam ngei Chief Secretary atana dah tura nawr an rel a; nimahsela chhan mumal tak sawi fak tur awm loin an ṭhulh leh ta niin a lang.

Chief Secretary dinhmun pawimawhzia hriat chuan duhthusamah chuan Mizo ṭawng thiam ngei CS neih hi a ṭha a, chutihlaiin Mizo ṭawng thiam ngei Chief Secretary tur remchang kan nei em tih hi chhut tham a ni ve bawk ang.

A lehlam zawnga thlir phei chuan Mizo ṭawng thiam lo Chief Secretary kan neih mêk hi kan Chief Secretary ni tawhte aia a ṭhat loh zawkna emaw, a thawh chak loh sawtna emaw sawi tur a awm a nih lem loh phei chuan ani awmlai ngeia Mizo ṭawng thiam Chief Secretary lo ngen reng pawh hi thil danglam tak chu a ni.

Chief Secretary dinhmun pawimawh tak chelh tur hian Mizo ṭawng thiam kan nei a nih chuan an ṭha ngei ang a, chutihlaiin Mizoram Chief Secretary atana tehna lian bera 'ṭawng thiam' tih kan hmang ta mai anga lang hi chu ngaihtuah nawn leh a ṭha ngawt mai.