Mirethei pual in sakna pawisa

Ministry of Consumer Affairs, Food & Public Distribution leh Ministry of Rural Development changtu minister of state Sadhvi Niranjan Jyoti chuan central sponsored scheme (CSS) tihhlawhtlin kawngah Mizoram sorkar chu a chet muan thu leh hma la chak se a duh thu sawiin, "Central chuan a tih tur a ti a, state-in a tih tur a tih ve a ngai," a ti.

CSS hnuaiah hian sorkar laipuiin pawisa 90% a tum ṭhin a, state-in 10% an tum ve a ṭul ṭhin. Minister sawi danin Mizoramin a pawisa tum ve tur a pek chhuah tlai ṭhin avangin hna a kal chak thei lo.

Pradhan Mantri Awas Yojana (PMAY) hnuaia miretheite'n in an neih theihna atana ruahmanna kalpui dan sawi chhuakin Niranjan Jyoti chuan, "Mizoram tan hian PMAY hnuaiah mi 15,674 ten in an neih theihna tur sanction a ni a, kum 2023-ah zawh vek tur a ni. Hetiang a nih lai hian tunah hian in 5,800 (40% vel) chiah sak zawh a la ni. Minister leh sorkar official-te ka ngen duh chu, a hun taka zo turin hma la se, a dang pawh sanction leh theih a ni dawn," a ti.

Kan state hian thawh chhuah mumal sawi tham kan neih loh avangin sorkar laipui nena kan thawhdunnaah pawh hna a kal chak thei lo a, kan pawisa tum ve tur kan pe hleithei ṭhin lo. Hetihlai hian Mizoram sorkar hnuaiah tho project lian tham tak tak ṭhenkhatah chuan state-in a tum ve tur pawisa (state matching share) hi hlawm lian thamin an pe zung zung lawi si a, sorkar hian ngaih pawimawh deuh leh ngaihthah bîk a nei a nih chuan a fel lo hle ang.

Mirethei in sakna pawisa sorkar laipuiin min pek vek tawh hnuah pawh kan tum ve tur sum kan pek chhuah tlai avangin hna a kal chak lo tih central minister ngeiin a rawn sawi chhuak hi a vanduaithlak a, mirethei chenna in aia ngaih pawimawh hi awm tam lo se a ṭha ngawt mai.