Bamboo link road a nghahhlelhawm

Prime Minister’s Deve­lopment Initiative for Northeast (PM-DevINE) hnuaia Union budget-a Mizoram tan bik bamboo link road siamna tur cheng vbc. 100 leh Aizawl by-pass road on western side atan cheng vbc. 500 dah chu Mizoram sorkarin a bawhzui mêk a, tihfel ngaite a tifel chho zel.

State dang tana PM-Devine hnuaia a hranpaa pawisa dah a nih ve loh laia Mizoram tana pawisa dah hran a ni hi thil lawmawm tak a ni a, heng pawisa zozai hi dik leh ṭha taka hman chuan ram tan a ṭangkai dâwn hle a ni.

Hetihlai hian thil dangah state dang dâwn ang kan dâwn ve loh te, kan tiatpui state dang an pek zat min pek ve lohte a awm ngei ang tih ring ila. A sum fai zawnga teh kher lo pawhin state dang duhsakna ang kan dawn loh hi a awm nual ang tih chu kan state dinhmun thlir hian a hmuh theih tih erawh hriat tel a ṭha awm e.

Bamboo link road bik hi chu state dangin an neih ve loh a ni a, kan state puala min pek tur a ni. Kan sorkarin an ngaih pawimawh ber (flagship) chu mau/ rua a ni a, hemi hmanga Mizoram economy chawi san hi a tum a ni a, ruahmanna pawh thui tak siam mêk a ni. Hetihlai hian kan thlen chin chu mau/ raw supplier thlan leh a chi sem lam a la ni a, sum lalut tura hralh theiha sawngbawl chu a la hla deuh. Chumi atana pawimawh tak mau/ raw phurh luh leh phurh chhuahna tur kawngpui laihna sum kan hmù tur hi a lawmawm hle a ni.

Mizoram hian infrastructure din tura sum sawi/ dil chhuah hi kan thiam lo hran lo a, kan sum dil chhuah sâ ṭha taka hman erawh kan thiam lem lo tih chu kan ram dinhmun enin a lang chiang hle. Bamboo link road kher hi chu sorkarin a ngaih pawimawh ber project nena inzawm a nih angin ram tana ro tling tura siam ni se. Political party mi leh sâ induhsakna atana chan sawma sem kual ni lo se a lawmawm hle a ang.

A lawmawm ber tur erawh chu a mau/raw hralh tur thar chhuah a ni a, a phurh chhuahna kawng awm ruak tawh, a phurh chhuah tur mau/ rua awm mang lo kan nih lohna turin sorkarin mau leh rua hralh chi nia an sawi hi tun aiin ching uar deuh se. A phurh chhuahna tur kawngpui siamna atan ringawt pawh cheng vbc 100 sen a nih chuan, mau/raw hralhna aṭang hian vbc 100 aia tlem lo chu hmuh chhuah ngei a ngai ang.