Sorkar tán a luhaithlak

Mizorama sumdawng pawl hrang hrangte chuan an sumdawnna dawrte hawn theih  tawh an duh thu Chief Secretary hnenah an thlen mek a, an beisei anga chhanna an hmuh loh chuan ni thum chhung dawr zawng zawng khar an tum. 

Hetihlai hian Aizawla veng ṭhenkhat chuan an huam chhungah total lockdown lai pawhin dawr hawn an phalsak reng tho a, hun bi neia dawr hawn phalsak an awm a, sorkarin phalna a pek chinte bâk inhawn phalsak lo an awm bawk. Tun hnaiah police lam ngenna angin dawr inhawn phalsaktu veng ṭhenkhat chuan dawr hawn a remchan loh thu an chhuah leh tawh a chutianga police ngenna ngai­changtu veng zinga veng ṭhenkhat chuan anmahni remchan angin an veng chhunga dawr hawn dan ruahmanna thar an siam leh ta. 

Tuna lockdown kalpui mekah hian Aizawl khawpui, district headquarters leh containment area chhungah sorkar aṭanga phalna nei lo tán chuan dawr hawn chu sawi loh, mahni compound pawh chhuahsan phal a ni lo. Hetihlai hian dawr tam tak a inhawng a, a dawrtu mihring an awm zel bawk a, lirthei chhuak thei pawh a tam leh ta hle. 

Hetiang boruakah hian kan Chief Minister chuan Instagram lamah, 'Lirthei hmanga chhuah chungchangah hriat fuh loh kan nei a ni lo maw?' tiin mipui lamin lockdown kalphung an hriat fuh tawk loh dante a tarlang. CM-in Instagram-a a thu chhuahah hian, "A harsa zawng leh kawi zawnga lak tum tlat chuan sawisel tur chu a awm zel ang. Mipuite hi pawn chhuak lova mahni ina tawm ṭheih tura tih an nih avanga total lockdown puang na na na, awlsam taka pawn an chhuah theih nana ruahmanna siam tura sorkar beisei tlat te hi a fel bik lova, hei hi sorkar thil tum a ni lo tih hi hre tlang ila," tia ziakin mipui lam a mawhpuh lêt anga ngaih theih a ni. 

Kan ram hruaitute hian kan tána ṭha tura beiseiin ruahmanna an siam a; nimahsela thla thum chuang dawr luah man chawi chunga dawr hawng thei lote tán chuan a rei tawh hle a, sumdawng lamin dawr hawn an nawr pawh hi a mak lo. Mipui pawn chhuah ṭul tak takte pawh hi dem vak chi an ni tawh lo a, loh theih loh thil a tam tawh em avangin an chhuak lo thei tawh lo a nih hmel zawk. 

Kan state dinhmun thlir ila, Covid-19 hri vei kan la neih belh zel tih hre chung hian, mithiamte nen ngun zawka sawiho a, kalphung siam rem hret hret a hun ṭan dâwn a nih hmel e.