Lockdown hlih tur nge pawhsei tur?

Covid-19 avanga Mizorama inkharkhip thawh sarihna kalpui mek chu June 30 hian a tawp dawn a, a kalpui zel dan tur ngaihtuah turin mi pawimawhte an ṭhukhawm leh dawn a ni. 

India ram pum huapa inkhar­khip chu thawh dul a ni tawh a, chutihlaiin Covid-19 hri len tamna hmunahte chuan khauh takin lockdown hi kalpui mek zel a ni a, hmun ṭhenkhatahte phei chuan total lockdown kalpuiin pawn chhuah phal a la ni lo. 

Mizoram chhung bikah chuan kan din­hmun tawn mekte thlirin sorkar lam chuan lockdown thawh sarihna kalpui mekah zawi zawiin a inthlahdul ve hret hret a, Aizawl khawpui huam chhung, district headquarters leh containment area-a an puan bik tih lohah chuan nunphung pangngaiah kan let leh ṭan mek  niin a lang. 

Hetihlai hian hri vei hmuh chhuah thar nitinin an la pung mek zel a, heng mi vanduaite hi state pawn aṭanga rawn haw deuh vek an ni a, khung hranlai an ni deuh vek bawk a, a tira kan hlauhthawn ang em em kha chuan kan hlauthawng ta lo. Mipui nawlpui pawhin Covid-19 hi kan hlauh dan a nep ta deuh niin a lang a, eizawnna lam a nghawng nasa bawk nen, inkhuahkhirh thlahdul duhna a lian ṭan hle. 

Ngun taka ngaihtuah ngai ta chu, "Lockdown hi tawng­pawng hlih fai vek tur chi nge, muangchanga a tahtawla hlih tur?' tih hi a ni ang. Kan hlauh tak loh avanga in chhuah huk hian buaina lian zawk a thlen thei a, kan ei leh bar dinhmun harsa mek chhuanlama kan inhawn dar vek chuan, kan hlauhthawn hripui ṭai darh kha kan cho chhuak ve thei. 

Hei vang hian thunei­tu lam pawhin zau takin ngaihtuahna seng se, mi eizawnna tibahlah zawng ni si loa fimkhur taka inkhuahkhirh dan zawn a la ṭul hmel. Kan hlauh hripuiin min luhchilh ta maw tiha kan inhawn fai vek chuan kan tan a pawi lêt thei a; eizawnna tibahlah tam lo thei ang ber ngaihtuah chungin, mipui nawlpui pawna chhuak huk lo thei tura ruahmanna siam hi thil theih a la ni awm e.