Oil pawlh dal leh Mizoram

Serchhipa petrol pump pakhata dah tur petrol phurh thlen chu endikna aṭangin a ṭha tâwk lo tih hmuh chhuah a nih avangin thuneituten an finfiah hnuah thawn lêt a ni. 

Mizorama kan buaina lian tak pakhat chu kan lirtheia petrol leh diesel kan thun tur pawlh dal a ni ṭhin hi a ni. A hre chiang deuhte sawi dan phei chuan lirtheia thun tur petrol leh diesel Mizorama an phurh luh zawng zawng deuhthaw hi an pawlh dal hmasa ṭhin a, hei hi kan lirtheiin nasa takin a tuar mêk a ni. 

Heti chung hian petrol pawlh dal man chhuah sawi tur hi a tam lo hle a, state dangte aia petrol leh diesel ṭha lo zawk kan hmang reng mai hi tihtawp a hun tawh khawp mai. Kan rama oil phur luttute ngam lo ang maia a sorkar leh mipui zawkin kan tuar tlawk tlawk mai hi a dik lo a, dan dik loa phurh luh oil pawlh dal reng reng hi chu huaisen taka hnawl ngam a hun tawh hle. 

Kan sorkar official oil pawlh dal vengtute pawh khauh taka oil endik thei tur khawpin invawng se, petrol pump (filling station) neitu lam pawhin petrol pawlh dal zawrh hi mi tam tak lirthei tihchhiatna a nih vangin ram pawisawina a tling tih pawm bawk se, misual inthurualte vanga petrol leh diesel pawlh dal reng mai hi tihtawp ni rawh se.