Kawngpui chhia leh Mizoram

Kawrthah Jt. YMA leh Tuidam YMA-te bul tumin tun hnai khan Darlak leh Tuidam inkar kawng siam hnatlang neih a ni a, mi ṭhahnem tak an thawk chhuak. Hetihlai hian Mizoram tlawhtu Inspector General of Assam Rifles (East) chuan Larsap hnenah Mizoram kawngpui chhia a ngaimawh thu sawiin hmun kilhawr zawk leh District headquarter-te inkal pawh zung zung theihna turin kawng chhiate siam ṭhat ṭul a tih thu a sawi.

Politics thilah hi chuan tute pawhin thu dik leh thil ṭha pawh sawi se pawl lehlam chuan an pawm thei lo ṭhin a, politics-a thu inchuhah hi chuan a dik leh dik lo thliar a harsa ṭhin. Tun hnaia Mizoram kawngpui chungchanga thil thleng hi chu YMA hnatlang leh state pawn aṭanga rawn tlawhtu sipai hotu thu sawi a ni a, politics-a hamṭhatna zawnna thil a nih loh avangin kan kawngpui dinhmun a tilang chiang kan ti thei awm e.

Khaw thlang panna kawng­pui ber ni si hun rei tak chhung a chhe tawh leh sorkar a che si lo hi thil pawi tak a ni a, tun hnai fura chhe thut ni loin Mamit leh Tuidam inkar kawngpui hi a chhe rei tawh hle a ni. Tut leh Mamit inkar kawngpui siam meka lei minte nen a inang lo a, kawngpui pawimawh ni si hlamchhiah ang maia a awm hian mipui tan harsatna lian tak a thlen a ni.

Sipai hotu hian a zin kualnaah Mizoram kawngpui dinhmun a hmuhin a ṭha lo tih a hria a, venhimna thlenga a nghawng theia a hriat avangin ṭha taka inkal pawh zung zung theihna tura kawngpui ṭha zawka siamtir turin Larsap hi a ngen a ni ber mai.

Politics-a ṭan lam nei lote chet dan aṭang hian Mizoram kawngpui hi a ṭha lo tih a chiang a, sawi mam leh chhuanlam siam loa a siam ṭhat hna thawh ran a ṭul hle a ni.