RT-PCR politics

Covid-19 hri endikna RT-PCR khawl chu tun hnai khan Congress Legislature Party (CLP) leader Zodintluanga Ralte chuan Lunglei Civil Hospital-a dah turin a pe a, Civil Hospital hian kawl loin DC office-ah an pe kir. Health & Family Welfare minister chuan tun hnai khan thuchah tichhuakin, RT-PCR chu mi ṭhahnemngaite'n donate (pek) an duh thu sorkarah an thlen ṭhin tih a sawi a, "An ṭhahnemngaihna a fakawm rualin, inthlahrung takin kan hnar a ngai ṭhin," a ti.

Hetihlai hian Zo Peoples' Movement (ZPM) Legislaturte Party leader Lalduh­oma chuan June 1 khan Mizoramin RT-PCR hawh chawp kan hman avangin RT-PCR pek a duh thu sorkarah a thlen a; nimahsela sorkarin ruahmanna dang an nei tiin an chhang a, a pe ta lo. 

Tunlaia sawi hlawh ber pakhat chu RT-PCR chungchang hi a ni. Tun hnaiah mi thilphal pakhatin sorkarah RT-PCR leina a pe a, sorkarin lawm taka dawngin khawl thar hi hun rei lo te chhungin a lei nghal thei a ni. Hetihlai hian eptu MLA pahnihin khawl lei an tum leh an lei tak kalpui zui zel dan erawh politics-a inepna rim a nam deuh a, a pawi ngawt mai. 

Sorkar hian hri do kawngah ṭan rual a ṭul thu a sawi ṭhin a, mipui pawhin an zawm ṭha a, kan ṭang rual ṭha hle a ni. Political party lam pawhin hei hi an zawm ṭha thawkhat a, thil fel lo leh dik lo nia an hriatte an au chhuahpui tih lohah chuan, eptu lam pawhin Covid-19 dona kawnga sorkar do zawnga an chetna a awm vakin a lang lo. Eptu MLA-te pawhin hri dona atan an MLA fund-te an thawh bakah kawng hrang hrangin ṭan an la hlawm. 

Hetihlaia RT-PCR khawl mamawh loa insawi sorkarin midang khawl hawh chawpa a kalpui reng mai te, a lei tawh sa pawh a hmanna lama buai theih avanga lawm taka an dawng thei lote hi chu a zia lo khawp mai. 

Lungleia RT-PCR khawl bun nghal mai hi a harsa mai thei a, laboratory din hmasak a ngaih bakah a khawl enkawltu mithiamte pawh dah an ngai ang a; nimahsela sorkarin thilpek (RT-PCR) a dawng tawh a, lawm taka lo dawn phawt a, a kal zel dan tur chu ngaihtuah zui se a ṭhat tehlul nen, boruak ṭha lo tak a awm zui hi chu hri donaa ṭang rual tura min sawmtu sorkar tihah a inhmeh lo deuh niin a lang. 

Sum leh pai pek apiang lawm taka dawng a, sum leh pai thawh khawm zel tura mipuite sawm a, sorkar hnathawkte hlawh bat ṭhen­saktu sorkarin Covid-19 dona khawl man to tham tak lawm taka a dawng thei lo kha chu sawi zui a hlawh rei deuh dawn a nih hmel.