Raltlante khuahkhirhna

Kolasib DC chuan tun hnai khan Myanmar raltlante khuahkhirhna tur thupek a chhuah a, Village Level Committee on Myanmar Refugee-te chu thupek ṭha taka kengkawh turin a chah a, dan zawm lote chu thuneitute hnena hriattir turin a ngen.

Myanmar aṭanga raltlante hi kan thisen zawmpui, kan unaute an ni a, an ram dinhmunin a zir loh avangin in leh lo kalsanin sahimna zawngin Mizoramah an lo lut a ni.

Raltlante dawnsawn hi a Mizoin a Kristian a, chumi piah lamah kan unaute an nih hlawm bawk avangin ṭha taka dawnsawn hi a bata kan bat a ni.

Hetihlai hian 'raltlan' an ni tih erawh theihnghilh tur a ni lo a, India rama dan anga ziah luh te, in leh ram leitir te, an duhna hmuna an kal kual zung zungte leh India khua leh tui anga document pawimawh neihte hi anni tan a thiang lo. Hei hian raltlan­te en hran leh hmuhsitna lam a kawk hran lo a, raltlan an nih angin hetianga enkawl hi a ṭul zawk a ni.

Raltlante sahim­na tur kan lo pek te, ei leh in lama kan lo chhawmdawl te leh an riah leh tawm hulna kan lo siamsakte hi a hluin a pawimawh em em a ni. Rilru fim tak nen sorkar ruahmanna chinah ṭha taka dawnsawn a, a bak huang zauh chiam loh a finthlak awm e.