Ramri leh kuhva

Tun hnai khan Mizoram leh Assam Chief Minister-te chu New Delhi-ah an inbia a, state pahnih ramri chungchang an sawi bakah Myanmar aṭanga kuhva tawlhruk chungchang leh Mizorama kuhva thar hralh chhuah dan an sawi dun.

State pahnih Chief Minister inkawmin ramri chungchang an sawi dun hi thil lawmawm tak a ni a, anni meuh an inbiak tawh chuan kan ramri pawh a fel thuai turah a ngaih theih ang. An inbiak tawh hnuah pawh ramri hi chinfel a la nih loh cheu chuan tlan lehna tur a vang tawh dawn a; NDA leh NEDA lama awm dun an nih bawk avang hian tihfel theihna remchang an nei ṭha lehzual awm e.

Chief Minister pahnih indawrnaa an sawi pawimawh tak pakhat chu kuhva chung­chang a ni. Ram pawn aṭanga dan loa kuhva phurh luh nghawng chu na takin kan tuar mek a ni. Dan anga chhiah lakna a ni lo a, dan loa lakluh a nih avangin vawi leh khata hlawk thut theihna a nih avang hian thil ṭha lo lam tam tak a luhpui a, khawpuia in hmun man thlengin nasa takin a nghawng nia sawi a ni a; a pawi ber pakhat chu Mizorama kuthnathawktute thar chhuah kuhva rah hralhnain a tuar hi a ni.

Ramri chung­chang hi 'inbiakna' bawr velah hian kan tawp san mai ang tih a hlauhawm a, chinfel kan duh tak tak a nih chuan a nawr chak dan a awm ngei ang. Kuhva tawlhah hi chuan sorkar hian a duh phawt chuan dan loa langsar taka kuhva phurh luh hi a titawp thei a, 'A titawp duh nge duh lo?' tih hi a zawhna tur zawk chu a ni awm e.