Kan medical college neih chhun

Mizoram Chief Minister chuan Union Health Minister hnenah Zoram Medical College chu sawrkar laipui kuta dah turin a ngen. ZMC enkawl chu Mizoram sorkar tan a hautak avang leh mi thiamten an zirchian hnuah sorkar laipui kuta hlan chu ṭhaa an hriat thu Chief Minister hian a sawi a, seat 50% hauh a nih tur thu a sawi.

Tuna Falkawna kan medical college neih mêk hi Congress sorkar hunlaia din niin a hmingah Mizo­ram Institute of Medical Education & Research (MIMER) vuah a ni a, MNF-in sorkarna vawn fung an chelh hlim khan a hming hi Zoram Medical College tia thlak a ni. He college-ah hian MBBS zirna awmin seat 100 a awm a, state sorkar hnuaia awm a nih angin Mizo zirlai tán seat ṭhahnem tak a awm thei a ni.

Hetihlai hian medical college enkawl hi a hautak viau mai a, sorkar sum leh pai indaihlohna a nasa bawk nen sorkar laipui kuta hlan tumna a awm pawh hi thil mak a ni lo.

Hetihlai hian Airport Autho­rity of India kuta Lengpui Airport hlan tumna a awmlaia dodaltu chu MNF an ni a, tunah hian Lengpui Airport chei ṭhat hna hi sum tam tak senga kalpui theih a nihlaiin ZMC enkawlna tur chuan sum a indaih lo mêk si a ni.

Kan zo lo chunga ZMC enkawl tum hram hi a ṭha ber lo thei a, a enkawl ṭha theitu tur kuta hlan mai hi a ṭha zawk thei, nimahsela kan seat chân tur erawh a uiawm tham dawn hle thung.

Mizorama doctor indaih­lohna a nasat dan leh, sorkar meuh pawhin rawih tur a hmuh mang lohlaia ZMC lama 50% seat chiah hauh tura sorkar laipui kan pek chhan hi sum leh pai indaihlohna vang a nih ngai chuan, kan sorkar hian kan medical college neih chhun aia sum hmanna tura ngaih pawimawh a neih vang a ni mai lo maw?