Assam Rifles sawn chhuah

Chief Minister chuan Zokhawsanga Assam Rifles hmun chu Union Home Minister-in kumin November-ah a hawn dâwn thu leh, a hawn tawh ber chuan Assam Rifles-te chu Aizawl khawpui laili aṭangin an insawn chhuah a rin thu a sawi a, Home Minister hi he hmun hawng tur hian a phûr hle niin a sawi bawk.

Assam Rifles sawn chhuah tur thu hi thil thar a ni lo a, hun rei tak chhung chu an insawn chhuahna tur hi sorkar laipui pawhin a buaipui tawh a ni. Mizoram sorkarin an awmna tur hmunhma ṭha tak a pe a, sorkar laipuiin an chenna in turte leh pisa ṭha tak a sâ tawh a, tui leh êng pek an nih tawh piah lamah a panna kawngte pawh ṭha taka siam a ni tawh.

Tunah hian Assam Rifles insawn chhuahna tur daltu hi a awm tawh lo a tih theih a, chuvangin rei lo teah chuan an hmun nghet tur lam an pan i beisei ang. Tunah phei chuan Home Minister meuhin an hmunhmate a hawng dâwn a nih hmel a, chuti a nih chuan Chief Minister sawi ang hian an insawn chhuak ngei dâwn niin a lang ta a, Mizo mipui tán thu lawmawm tak a ni.

Hetihlai hian kan hriatreng atana ṭha chu an lo insawn ta chiah lo a nih pawhin Chief Minister thiam loh pakhat mah a awm lo a, MNF sorkar hi dem tur a ni lo a, sorkar laipui lam kut a ni.

Chutiang bawkin an lo insawn chhuak ta a nih pawhin Chief Minister leh MNF lam tih ni loin sorkar laipui lam tih bawk a ni ang. Assam Rifles chungchang leh tualchhung politics sawi pawlh a, ruling party kan dem dan hi thil tih loh atana ṭha a ni e.