Smuggling thubuai neitu leh Mizoram sorkar

ZPM hruaitute chuan tun hnai khan Kolasib Press Club-ah thuthar thehdarhtute an kâwm a; September 24, 2022-a Kolasib Fast Tract Court building sak tur lungphùm phùmnaah Assam sorkar hnuaia thubuai nei lai Abub Mazumdar a tel tih sawiin; a tel chhan sawifiah turin Chief Minister Zoramthanga an phût a, CM bakah hian Abub-a'n tukṭhuàn a eina in neitu Kolasib bialtu MLA pawh thil awm dan sawifiah turin an phût.

Abub Mazumdar hi Mizote tan mi thar a ni tawh lo a, kum 2021 November-a Assam House, New Delhi-a Mizoram leh Assam Chief Minister-te'n ramri chungchang an sawihonaah pawh a lo tel ve tawh. BJP Mizoram chuan Abub hi Mizoram Chief Minister team lamin an sawm zawk a nih thu an chhuah nghe nghe a ni. Hetihlai hian MNF bakah Mizoram Chief Minister Office (CMO) lam chuan thuchhuah siamin Abub hi Mizoram Chief Minister sàwm a nih loh thu an sawi thung a, thuchhuahah hian Mizoram House lamah Abub leh Mizoram CM an inbiak thu erawh an ziak tel a ni.

Engpawhnise, ṭhenawm state lamin smuggling lama a inhnamhnawih avanga an man, bail-a an chhuahtir lai ni bawk si, Mizoram sorkar hun pawimawh taka a lo lang nawlh mai hi thil mak a ni a, zawhna tam tak a piang lo thei lo. Kum 2018-ah MNF kaihhruai sorkar thar lawmluhnaah pawh Abub hi a lo tel tawh niin an sawi bawk a, CM pahnih inbiaknaah a tel leh thei bawk a, mi pawimawhte telna tur chinah a tel ve nalh nalh zel a ni.

Assam sorkara thubuai nei chunga Mizoram sorkar hun pawimawha tlangnel tak; Abub Mazumdar hi sawmtu awm loin amahin a tel ve ngawt lo ang tih a rin theih a, tu nge sàwm a, eng vangin nge an sawm tih zawhna hi Mizo mipuiten an hre châk a ni.