New Market versus phullem phah

New Market sumdawng Joint Association (NMSJA) tun hnai khan New Market-ah an dàwr awmna in ṭhiah a nih avanga an harsatna tawhte an puang a. In sak mek sak zawh vat leh main building sak ṭan vat an phût thu sawiin, "Sorkar hian kan chaw bél min ben buaksak a ni tih lo hre mawlh rawh se," an ti.

NMSJA hruaitute chuan, "Smart City sum hmanga sak ṭhat tura tih a ni a, sum ruahman chu cheng vbc. 42.38 a ni. Phûl lem phah kan sawisel lo, mahse, Mizoram mawina ka duh, Mizoram hma­sawnna ka duh an ti a nih chuan New Market-ah hian an lantir dawn lo em ni? Dawr neitu tam takin a rûkin kan tuar ngawih ngawih a, kan mittui a tla a ni," an ti.

New Market ṭhiah chung­chang leh sâ ṭha tura tun thlenga tender chhuah a la nih loh thu hian sawi a hlawh hle a, chhungkaw tam tak eizawnna a nghawng tel avangin ngaih pawimawh a ṭul viau a ni. He building sakna tura sum dah hi hmun dangah pawh pen emaw, sorkar sum indaih loh vanga K Deposit lama dah emaw a nih chuan thil fel lo tak a ni ngei ang.

Mizoram hi India ramah population aṭanga chhuta khelmuala phullem phah tamna ber niin an sawi a, hmasawnna lawmawm tak a ni. Hemi leh­lamah chiah hian phullem phah thei sorkar hian mipui mamawh dangte hi phuhruksak tel thei se phullem phahte hi sorkar chawimawina a nih dawn laiin, nitin khawsaknaa mamawh tam tak pe thei lo sorkarin phullem a phah tlut tlut hian sawisel a hlawh phah ta a ni.

A buaipuitu leh a hnathawktu tana hlawk tham tak maiin Mizoram sorkar chuan hmun hrang hrangah phullem a phah thei a, hetih laia New Market-a eizawngtute tana harsatna a thleng reng erawh sorkar hian a chin fel vat a ngai.

NMSJA lamin sorkar kar dan dang an hriat thu leh, chutianga tih ngai loa rang taka che tura sorkar an beisei hi sorkar hian ngaihven se. Eizawnna nena inzawm thil a nih avangin ngaihtuah rang se; phullem heti zat phah thei sorkar hian a ngai pawimawh a nih chuan New Market building sak theih loh thu a awm dâwn em ni?