RTI Act leh sorkar

Mizoram Information Commi­ssion (MIC) chuan tunlai hian RTI Act, 2005 Section 4(1)(b) zâwm ṭha lo sorkar department ṭhenkhat an ko.

Chief Information Commi­ssioner (CIC) leh Information Commissioner (IC) ten sorkar department hotute hi kawmin RTI Act, 2005 Section 4(1)(b)-in a phût angin sorkar department-te chu an website-ah RTI Act hmanga dil ngai loa tarlan theih - Departmental Appellate Authority (DAA) leh State Public Information Officer (SPIO)-te biak pawh theihna contact number, department directory, scheme leh programme hrang hrang department-in a kalpui te, act/ rules/ regulations hrang hrang department-in a tihchhuah te, department hnuaia beneficiary list te, deptt budget dawn dan leh mipui tana ṭangkai tur information-te dah tur a nih thu an hriattir nawn a ni.

RTI Act hi sorkarin mipuite tana a hnathawh lang tlang taka hmuh theihna remchang a ni mai lo a, a nihna takah chuan sorkarin ṭha zawk leh dik zawka mipui rawng a bawl theihna tura khalh ngilna hmanraw pawimawh a ni. Mi ṭhenkhat hian sorkar tih­mualphona tur hmanrua leh sorkar lai beihna hmanrua emaw an ti palh mai ang tih a hlauhawm.

A nihna takah chuan sorkarna vawn fung chelhtute tán pawh an hnathawh ṭhatte puanzarna remchang a ni a, mipui nawlpuiin an hriatpui loha hna an thawhte puanzarna a ni thei a, hman thiam phei chuan sorkar lai fakna ṭha tak a ni thei. Tunah hi chuan kan hman danah mipuiin an hriat duhlai an zawhna te, thil fel lo awm nia an hriat an chhuina ang deuh chauhah kan hmang a, ṭangkai zawka hman belh dan a awm zel ang.

Engpawhnise RTI Act hi dik leh ṭha taka hnathawkte tán a hnawksak lo mai ni loin a lawmawm zawk a. RTI Act hmanga zawhna chhang ṭha duh lo leh he act-in a phût ang zawm ṭha lo sorkar kan nei palh ang tih a hlauhawm a; dik taka hnathawktu sorkar department tán RTI Act hi thil hnawksak a ni ngai lo ang.